Andijon viloyatining Xo‘jaobod tumanida bugun, 18-fevral kuni Xalq deputatlari Xo‘jaobod tumani kengashining oltinchi chaqiriq navbatdan tashqari yigirma oltinchi sessiyasi o‘tkazildi. Unda viloyat hokimi Shuhrat Abdurahmonov ishtirok etib, tashkiliy masala ko‘rib chiqildi, deya xabar berdi “Daryo” muxbiri.
Sessiyada Andijon viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelgan O‘tkirbek Shukurov Xo‘jaobod tumani hokimi vazifasiga nomzod sifatida ko‘rsatilib, deputatlar tomonidan ma’qullangan.
O‘tkirbek Shukurov Andijon shahrida tug‘ilgan bo‘lib, 2013—2017-yillarda sobiq “Kamolot” yoshlar harakati Markaziy Kengashi raisi, 2017—2019-yillarda Yoshlar ittifoqi raisining tashkiliy-kadrlar masalalari bo‘yicha o‘rinbosari vazifalarida ishlagan.
U 2019-yil fevral oyidan buyon Andijon viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimida ishlab kelayotgandi.
Shuningdek, Andijon viloyatining Paxtaobod tumaniga ham yangi hokim tayinlangan. Ayni kunga qadar Markaziy bankning viloyatdagi bosh boshqarmasiga rahbarlik qilib kelgan Elyorbek Usmonov Paxtaobod tumani hokimi sifatida ish boshlagan.
Andijon viloyati hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari lavozimiga esa Nasibullo Mo‘minov tayinlangan.
Nasibillo Mo‘minov 1983-yil Andijon tumanida tug‘ilgan bo‘lib, 2006-yilda Andijon muhandislik iqtisodiyot institutini tamomlagan. Mehnat faoliyatini 2001-yilda Andijon qurilish texnikumining maxsus fan o‘qituvchisi vazifasidan boshlagan. Turli yillarda Andijon uy-joy va kommunal xo‘jaligi kasb-hunar kollejida bo‘lim boshlig‘i, amaliyot ishlari bo‘yicha, o‘quv ishlari bo‘yicha direktor o‘rinbosari Andijon qurilish va transport kasb-hunar kolleji direktori, 2017—2018-yillarda O‘zbekiston Respublikasi Vazirlar Mahkamasi huzuridagi Ta’lim sifatini nazorat qilish davlat inspeksiyasi Andijon viloyati bo‘limi boshlig‘i, 2018—2019-yillar davomida esa Andijon viloyati hokimligi kasb-hunar ta’limi boshqarmasi boshlig‘i vazifalarida ishlagan.
U tayinlovga qadar Kasbiy ta’limni rivojlantirish va muvofiqlashtirish boshqarmasi boshlig‘i hamda bir vaqtning o‘zida viloyat hokimining jamoatchilik bilan ishlash bo‘yicha maslahatchisi lavozimida ishlab kelayotgan edi.
Mavzuga doir:
- Davlat soliq qo‘mitasi raisining birinchi o‘rinbosari Samarqand shahriga hokim etib tayinlandi
- Qorako‘lchilik va pillachilikni rivojlantirish qo‘mitasi raisi o‘rinbosari Qarshi tumaniga hokim etib tayinlandi
- Buxoroda prezidentdan dakki eshitgach, ishdan olingan sobiq amaldor hududiy boshqarmalardan biriga rahbarlik qilishni boshladi
Izoh (0)