Toshkent shahrining Sergeli tumanida yuk avtomobillari va ehtiyot qismlarini sotishga mo‘ljallangan do‘konda yong‘in chiqdi, deb xabar beradi FVV matbuot xizmati.
Ma’lum qilinishicha, 18-fevral kuni soat 03:30 da tumanning “Bunyotobod” MFY Yangi Sergeli ko‘chasida joylashgan yuk avtomobillari va ehtiyot qismlarini sotish do‘konida yong‘in sodir bo‘layotgani to‘g‘risida tuman favqulodda vaziyatlar bo‘limiga xabar kelib tushgan.
Shunga ko‘ra, 7 ta yong‘in-qutqaruv ekipaji voqea joyiga soat 03:36 da yetib borib, yong‘in soat 03:58 da qurshab olingan va soat 04:10 da bartaraf etilgan.
Yong‘in oqibatida do‘konning 900 kvadrat metr maydondagi ichki shift qismi va tashqi alyukobond qoplamasi yonib zararlangan.
Hodisa oqibatida tan jarohati olgan va halok bo‘lganlar yo‘q. Hozirda yong‘inning kelib chiqish sababi va moddiy zarar miqdori aniqlanmoqda.
Avvalroq Toshkentdagi “Yangiobod” bozorida yong‘in sodir bo‘lgani, Toshkentda teplovozda yong‘in kelib chiqqani to‘g‘risida xabar berilgandi.
Izoh (0)