«Ўғлимнинг тарбияси, таълимида биздан кўра бобо-бувисининг ўрни катта» — Шерзодхон Қудратхўжанинг онаси билан суҳбат

«Машҳурларнинг онаси» лойиҳасининг навбатдаги сони меҳмони таниқли тележурналист, Ўзбекистон журналистика ва оммавий коммуникациялар университети ректори Шерзодхон Қудратхўжанинг онаси Муҳтабархон Қудратхўжаева бўлди.

Биринчи даромадига соат сотиб олган

— Шерзодхоннинг болалиги жуда ҳам мазмунли ўтган. Турмуш ўртоғим иккимиз эрталабдан кечгача ишда юрардик. Болам ота-онасидан кўра бобо-бувисига кўпроқ меҳрибон бўлган. Қайнотам лавозим кишиси бўлса-да, қийин йилларни кўрган, ҳаётий тажрибаси бой инсон эди. Шунингдек, уйда қўй ва товуқлар боқарди. Шерзодхондаги ҳайвонот ва ўсимликлар оламига қизиқиш бобосидан ўтган.

Қайнотам сиёсат соҳасини яхши тушунгани боис набирасига бу мавзуларда ҳам гапирарди, уруш давридаги ҳаёт ва кейинги жараёнларни таққослаб, фикрларини сўрарди. Ўғлим мактабда гуманитар фанлардан аъло баҳога ўқиган. Маълум вақт балиқ, кейин қуш боқишга қизиққан. Кейинчалик сузишга қатнаган.

Ўз устида ишлаш, келажаги учун меҳнат қилиш мактаб давридан бошланган. 7-синф пайтида меҳнат дарсида «розетка» ясаб, уни ўқитувчисига топширган ва шундан топган пулига ўзи учун соат сотиб олмоқчи бўлган. Иккимиз дўконга бориб, 19 сўму 50 тийинга соат олганмиз. Ўғлимда ўз устида ишлаш, ота-онага ёрдам бериш кичиклигидан шаклланган.

Сиёсат соҳасини танлаганидан иккиланмаганмиз

— Фарзандимни журналистика, сиёсат соҳасига кириб келиши бизни иккилантирмаган. 4-синфда ўқиётганида турли газеталарга кичик-кичик нарсалар ёзарди. Ундаги ривожланиш, қизиқишни кўрган додаси сиёсат оламининг ўзига хос қийинчиликлари ҳақида сўзларди, бу соҳада хато қилишда эҳтиёт бўлишини таъкидларди.

Катта бўлгани сари бобоси уруш йилларидаги сиёсат ҳақида ҳам гапириб берар, Шерзодхон турли саволларига жавоб оларди. Отаси билан Россиянинг машҳур «Время» дастурини кўп кўрарди. Раҳматли додаси ўғлимнинг ҳаётида катта рол ўйнаган. Қайнонам ҳам ўқимишли аёл бўлган, Вазирлар Маҳкамасида фаолият юритган.

Шерзодхон йиллар ўтиб, журналистикани танлади. «Ҳуррият», «Тошкент оқшоми», «Халқ сўзи» каби газеталарда мақолалари чиқаверди. Унинг матбуотдаги чиқишлари нафақат мени, балки яқинлар ва қариндошларни ҳам хурсанд қилган. Илк марта «Ахборот» кўрсатувида чиққанида ҳам чексиз қувонганмиз. Ўша пайтдаги ҳис-туйғулар барибир бошқача бўлган.

Дарсини қилдира олмаганим учун бир марта урганман

— Шерзодхон оилада уч фарзанднинг тўнғичи. Укаси ундан бир ёш кичкина, айтганимизни аъло даражада бажаради. Қизим ҳам журналист — озгина қайсар. Балки, бу журналистларга хосдир. Шерзодхон эркин бўлишни ёқтиради. Учаласи ҳам ота-онаси, атрофидагиларга меҳрибон, ҳамиша ёрдам қўлини чўзишга интилади.

Турмуш ўртоғим билан фарзанд тарбиясига жиддий қараганмиз, уларни тўғрисўзликка, одилликка ўргатдик. Хато қилсаларингиз ҳам ёлғон гапирманглар, дердим. Банда борки хато қилади, хатойингни тан олиб, керак бўлса, кечирим сўра, деб уқтирардим. Уларга ёлғон гапириб, алдаш орқали бирор нимага қизиқтирмаганман. Бу усулни ёқтирмайман. Ортиқча бақириб, урган эмасман. Эсимда: Шерзодхонни 1-синфда ўқиган пайтида бир марта урганман. Унда ҳам дарсини қилдира олмаганман, асабим дош беролмаган. Ўша воқеани унутолмайди ўзи ҳам.

Сафарларга кетса, мен учун Тошкент ҳувуллаб қолгандек бўлади

— Ўғлим уйланиб, оила қургунча биз билан бир хонадонда яшаган. У ўқиш ёки ишда бўлган вақтлари уйимиз ҳувуллаб қоларди. Анча йил олдин Америкага борди, унда ёш эди. Ўша пайтда АҚШнинг қайсидир ҳудудида кучли портлаш юз берганидан хабар топдик. Аллоҳга шукрки, Шерзодхон портлаш жойидан бир неча соат аввал интервью олиб кетган экан. Бу бутун умр юрагимга муҳрланиб қолган.

Ҳозир ҳам сафарларга чиқса, мен учун Тошкент ҳувуллаб қолгандек туюлади. Унинг ҳаётида Халқаро пресс-клуб пайдо бўлгач, янада хавотир олишни бошладим. Жамоасини дуо қилиб ўтираман. Бирор вилоятга борганини телевидение орқали кўриб, хабар топаман. Унгача ўзи индамайди. Хавотир олмасин, дейдими, билмадим. Лекин кунига бир марта бўлсаям телефон қилиб, дадаси иккимиздан ҳол-аҳвол сўрайди.

Шерзодхон оилада яхши ота. Балки, она бўлганим учун шунақа деб ўйларман. Лекин атрофдагилар ҳам буни эътироф этишади. Фарзандларининг барча орзуларини иложи борича амалга оширишга ҳаракат қилади.

Лойиҳанинг тўлиқ вариантини «Дарё»нинг YouTube’даги саҳифаси орқали томоша қилишингиз мумкин.

Миролим Исажонов суҳбатлашди.

Тасвирчи ва монтажчи: Илҳом Хурсаналиев