O‘zbekiston milliy terma jamoasi va “Roma” klubi hujumchisi Eldor Shomurodov UEFA rasmiy saytiga katta intervyu berdi. Shomurodov intervyuda bolaligi, orzusiga qanday yetgani, faoliyati, o‘zbek va italyanlarning turmush tarzi, O‘zbekistondagi maqomi hamda bir qator boshqa mavzular haqida gapirdi.
Jarqo‘rg‘onda o‘tgan bolaligi haqidaOilamizda ko‘pchilik futbol o‘ynagan. Otam futbolchi bo‘lgan, bobom esa murabbiy. Shuningdek, amakilarim ham millionlar o‘yini vakillari hisoblanadi. Shu bois bolalikdan futbolga qiziqishim bo‘lgan. Yetti yoshdan boshlab tengqurlarim bilan mashg‘ulotlarga borishni boshlaganmiz. 12-13 yoshimda esa qo‘shni viloyatdagi “Mash’al” akademiyasiga borganman. U yerda professional tarzda futbol bilan shug‘ullanishni boshlaganman. Shundan keyin “Bunyodkor”ga taklif qilindim va u yerda O‘zbekiston chempionatida o‘ynay boshladim.
“Mash’al” akademiyasi va futbolchi bo‘lishida oilasining o‘rni haqida
Oilam har doim menga yordam bergan. Har doim, hatto yutqazgan paytlarimda ham qo‘llab-quvvatlagan. O‘sha paytlari o‘ziga yarasha qiyinchiliklar bo‘lgan, chunki uydan ketganimda juda kichkina edim. Oilamni sog‘inardim, lekin boshqa yo‘l yo‘qligini yaxshi tushunardim. Harakatlarim har doim uydagilarim tomonidan qo‘llab-quvvatlanardi. Muborakda yozda sahrodagidek issiq, qishda esa juda sovuq bo‘lardi. Lekin u yerdagi murabbiylar va akademiya juda yaxshi edi. Futbolchilar uchun esa sharoitlar yetarli darajada, shuning uchun chidash va ishlashimiz kerak edi.
Orzusi haqida
“Mash’al”da asosiy jamoa o‘ynaganida, biz bolalar bilan ularga to‘p uzatib turardik. O‘shanda men ham shunday darajaga chiqaman deb orzu qilardim. Tezroq jamoa safida shu maydonda o‘ynashim uchun o‘sishni xohlardim. Jiddiyroq o‘ynay boshlaganimda esa yanada ko‘proq o‘sishim va boshqa futbol muhitiga intilishim kerakligini tushuna boshladim. Uyga kelganimda doim Yevropa futbolini tomosha qilardik. Yaqinlarim ham u yerga borib o‘ynashga intilishim kerakligini aytardi. Shu tariqa Yevropada o‘ynash orzusi paydo bo‘lgan. Uni amalga oshirishga intildim va yakunda muvaffaqiyatga erishdim.
Bolalikdagi kumirlari haqida
Didye Drogba va Fernando Torres. Ularning o‘yinini juda yaxshi ko‘rardim va har doim kuzatishga harakat qilganman.
“Chelsi”ga muxlislik qilgani haqida
Avval “Chelsi”ning muxlisi edim. Hozir esa “Roma”ga muxlislik qilaman.
O‘zbekistonda qahramon sifatida ko‘rilishi va bu maqom u uchun nimani anglatishi haqida
Bu men uchun katta ahamiyatga ega. Buni so‘z bilan ifodalash qiyin. Bunchalik erta sardor bo‘laman va terma jamoa uchun shu qadar muhim futbolchi bo‘laman deb o‘ylamagandim. Hozir bizda avlodlar almashinuvi jarayoni kechyapti, jamoaga yosh o‘yinchilar kelmoqda men katta futbolchi sifatida ularga o‘rnak bo‘lishim kerak, shuning uchun bu men uchun juda muhim.
Vatani qanchalik muhim ahamiyat kasb etishi haqida
Vatanimni juda yaxshi ko‘raman. Men uchun mamlakat ham, O‘zbekiston terma jamoasi ham juda muhim. Terma jamoaga chaqirilgan vaqtimda vatanimga boraman, yoki ta’til paytida. Boshqa paytda bunga vaqt topa olmayman. O‘zbekistonni, ota-onamni sog‘inaman, albatta.
Ilyos Zeytullayevdan keyin A Seriyadagi ikkinchi o‘zbekistonlik ekanligidan faxrlanishi haqida
Albatta, bundan faxrlanaman, bu juda yoqimli. Lekin bizda ushbu darajada o‘ynay oladigan futbolchilar ko‘p. Ularning ham shu yerda harakat qilishlarini istardim. Imkon qadar ko‘proq o‘yinchilarimizning Yevropada bo‘lishini xohlayman. Bu butunlay boshqacha futbol, boshqa tezlik. Bu yerda o‘rganish mumkin bo‘lgan ko‘p narsa bor. Futbolchilarimiz Yevropada qancha ko‘p bo‘lsa, terma jamoaga shunchalik yaxshi bo‘ladi.
“Rostov”dagi faoliyati haqida
Birinchi yil unchalik yaxshi o‘tmagan. Moslashuv jarayoni bo‘lgandi. Keyin ko‘nikib ketdim. Butunlay boshqacha futbol bo‘lgan, nisbatan, Yevropaga yaqinroq. Bosh murabbiy Valeriy Karpin katta yordam bergan, u o‘zimga bo‘lgan ishonchimning oshishida katta ish qilgan va hammasi yaxshi rivojlangan.
“Jenoa”ga o‘tish va yana boshqa mamlakatga ko‘chish haqida“Rostov”da oxirgi yillarni juda yaxshi o‘tkazdim. Faqat oxirgi olti oy davomida yomon o‘ynadim. Buning o‘ziga yarasha sabablari bor edi. Lekin Yevropada o‘ynash istagi so‘nmagan. Oson bo‘lmadi. Gol urmaganingizdan keyin Yevropaga chiqish qiyin. Ammo “Jenoa” menga ishondi, buning uchun klubga rahmat. Ular meni “Rostov”dan sotib oldi. U yerga o‘tishga rozi bo‘ldim, chunki bu Yevropada o‘ynash orzum sari ilk qadam edi.
Top-klubda emas, balki tarkibga kirishim mumkin bo‘lgan joydan boshlash muhim bo‘lgan. Birinchi yil og‘ir o‘tdi. Rossiya va O‘zbekistonda mentalitet o‘xshash, Yevropada esa butunlay boshqacha. Shuning uchun, dastlabki ikki-uch oy oson bo‘lmadi, ammo keyin ko‘nikishni boshladim. Hozir bu yerdagilar qanday fikrlashi haqida yaxshi tasavvurga egaman.
Mamlakatlar madaniyati orasidagi farq haqida
Rossiya va O‘zbekistonda hamma narsa haftasiga yetti kun ishlaydi. Bu yerda esa shanba va yakshanba kunlari hech narsa ishlamaydi, hamma dam oladi. Butunlay boshqa madaniyat, boshqa til. Odamlar ham boshqacha o‘ylaydi.
Italiyadagi futbol Rossiya va O‘zbekistondagidan nimasi bilan farq qilishi haqida
Avvalo, bu yerda yuqori tezlik hukm suradi. Italiyada kuchga asoslangan futbol ustunlik qiladi. Futbolchilarning mahorati ham, albatta, yuqoriroq.
Yangi bosqichga chiqish uchun nima qilgani haqida
Avvalo, tezlik qo‘shish muhim edi. Faqat harakatda emas, balki fikrlashda ham. Italiyaga ko‘chib o‘tganimda, xotirjam o‘ynab ketaman deb o‘ylagandim, lekin mashg‘ulotlardayoq kechikayotganimni his qila boshladim. Himoyachilar meni yopib qo‘yardi, doimo oyog‘imga zarba qabul qilardim va bu borada nimani qo‘shishim kerakligini aniq tushunib yetdim.
Qaysi fazilatlari unga muvaffaqiyat olib kelgani haqidaQiyin savol. Menimcha, bu birinchi navbatda sabr-toqatga bog‘liq. Boshida qiyin bo‘lganida, o‘zimga bu mening darajam emasligini aytib, orqaga qaytishim mumkin edi. Lekin sabr qildim. Hammasi amalga oshishini bilardim. Sabr qilganim uchun hozir ishlarim joyida.
“Roma” o‘z safiga qo‘shib olmoqchi ekanini bilganida nimalarni his qilgani haqida
Mentalitetimni o‘zgartirishim kerakligini tushunganman. Har bir o‘yinga g‘alaba qozonish haqidagi o‘ylar bilan tushish kerak. Jamoa o‘z oldiga yuksak maqsadlar qo‘yishini bilardim. Bu yerda raqobat ham ancha jiddiy. Har bir uchrashuvda o‘zingning tarkibga loyiq ekaningni isbotlashing kerak.
Joze Mourinyo bilan birga ishlash qandayligi haqida
U o‘z oldiga katta maqsadlar qo‘ygani va shu maqsadlarni amalga oshirishga kirishgani ilk kunlardan ma’lum bo‘ldi. O‘yin va intizom borasida juda talabchan. U har bir o‘yinda g‘alaba qozonishni istaydi va o‘yinchilarning ham shunga intilishiga harakat qiladi.
Mourinyoning o‘z vaqtida Drogbani dunyoning eng yaxshi hujumchisiga aylantirgani va hozirda unga qanday yordam berayotgani haqidaHozir ko‘proq taktika ustida ishlayapmiz. U bizga ko‘p narsalarni ko‘rsatadi va har bir o‘yinda borimizni berishimizni talab qiladi. Albatta, o‘z navbatida ko‘proq gol urishimizni ham so‘raydi.
Konferensiyalar Ligasidagi golidan keyin nimalarni his qilgani haqida
Bu “Roma” safidagi ilk rasmiy o‘yinim edi (UEFA Konferensiya Ligasi pley-off bosqichidan o‘rin olgan “Trabzonspor”ga qarshi safarda kechgan o‘yin). Menimcha, o‘shanda meni almashtirishga tayyorgarlik ko‘rishayotgandi. Debyut uchrashuvimda gol urganimdan va jamoaga Konferensiya Ligasiga chiqish imkoniyatini berganimdan xursand bo‘lganman. Bu juda yoqimli tuyg‘ular.
O‘sha golini buvisiga bag‘ishlagani haqida
O‘sha kunlarda uning tug‘ilgan kuni edi. Buvimni shu tarzda tabriklamoqchi edim. U meni har doim qo‘llab-quvvatlaydi, barcha o‘yinlarimni kuzatib boradi. Butun oilam — ota-onam, buvim va rafiqam har doim o‘yinlarimni kuzatadi va qo‘llab-quvvatlaydi.
Ushbu mavsumda o‘z oldiga qanday shaxsiy va jamoaviy maqsadlar qo‘ygani haqida
Birinchi navbatda — Chempionlar Ligasi yo‘llanmasini qo‘lga kiritish va Konferensiyalar Ligasida g‘alaba qozonish. Bular asosiy maqsadlarimiz. Shaxsiy ambitsiyalarga kelsak, ular doimo jamoaniki bilan bog‘liq. Jamoaga g‘alaba qozonish va sovrinlarni qo‘lga kiritishda yordam bermoqchiman. Jamoa g‘alaba qozonsa, siz ham g‘alaba qozonasiz.
Eldor Shomurodov, futbolchi
Izoh (0)