«Ростов», «Рома»га ўтиш, Моуриньо, муваффақият сири, Ўзбекистон ва Италия менталитетидаги фарқ ҳақида. Элдор Шомуродов УЕФАга интервью берди

Ўзбекистон миллий терма жамоаси ва «Рома» клуби ҳужумчиси Элдор Шомуродов УЕФА расмий сайтига катта интервью берди. Шомуродов интервьюда болалиги, орзусига қандай етгани, фаолияти, ўзбек ва итальянларнинг турмуш тарзи, Ўзбекистондаги мақоми ҳамда бир қатор бошқа мавзулар ҳақида гапирди.

Жарқўрғонда ўтган болалиги ҳақида

Оиламизда кўпчилик футбол ўйнаган. Отам футболчи бўлган, бобом эса мураббий. Шунингдек, амакиларим ҳам миллионлар ўйини вакиллари ҳисобланади. Шу боис болаликдан футболга қизиқишим бўлган. Етти ёшдан бошлаб тенгқурларим билан машғулотларга боришни бошлаганмиз. 12-13 ёшимда эса қўшни вилоятдаги «Машъал» академиясига борганман. У ерда профессионал тарзда футбол билан шуғулланишни бошлаганман. Шундан кейин «Бунёдкор»га таклиф қилиндим ва у ерда Ўзбекистон чемпионатида ўйнай бошладим.

«Машъал» академияси ва футболчи бўлишида оиласининг ўрни ҳақида

Оилам ҳар доим менга ёрдам берган. Ҳар доим, ҳатто ютқазган пайтларимда ҳам қўллаб-қувватлаган. Ўша пайтлари ўзига яраша қийинчиликлар бўлган, чунки уйдан кетганимда жуда кичкина эдим. Оиламни соғинардим, лекин бошқа йўл йўқлигини яхши тушунардим. Ҳаракатларим ҳар доим уйдагиларим томонидан қўллаб-қувватланарди. Муборакда ёзда саҳродагидек иссиқ, қишда эса жуда совуқ бўларди. Лекин у ердаги мураббийлар ва академия жуда яхши эди. Футболчилар учун эса шароитлар етарли даражада, шунинг учун чидаш ва ишлашимиз керак эди.

Орзуси ҳақида

«Машъал»да асосий жамоа ўйнаганида, биз болалар билан уларга тўп узатиб турардик. Ўшанда мен ҳам шундай даражага чиқаман деб орзу қилардим. Тезроқ жамоа сафида шу майдонда ўйнашим учун ўсишни хоҳлардим. Жиддийроқ ўйнай бошлаганимда эса янада кўпроқ ўсишим ва бошқа футбол муҳитига интилишим кераклигини тушуна бошладим. Уйга келганимда доим Европа футболини томоша қилардик. Яқинларим ҳам у ерга бориб ўйнашга интилишим кераклигини айтарди. Шу тариқа Европада ўйнаш орзуси пайдо бўлган. Уни амалга оширишга интилдим ва якунда муваффақиятга эришдим.

Болаликдаги кумирлари ҳақида

Дидье Дрогба ва Фернандо Торрес. Уларнинг ўйинини жуда яхши кўрардим ва ҳар доим кузатишга ҳаракат қилганман.

«Челси»га мухлислик қилгани ҳақида

Аввал «Челси»нинг мухлиси эдим. Ҳозир эса «Рома»га мухлислик қиламан.

Ўзбекистонда қаҳрамон сифатида кўрилиши ва бу мақом у учун нимани англатиши ҳақида

Бу мен учун катта аҳамиятга эга. Буни сўз билан ифодалаш қийин. Бунчалик эрта сардор бўламан ва терма жамоа учун шу қадар муҳим футболчи бўламан деб ўйламагандим. Ҳозир бизда авлодлар алмашинуви жараёни кечяпти, жамоага ёш ўйинчилар келмоқда мен катта футболчи сифатида уларга ўрнак бўлишим керак, шунинг учун бу мен учун жуда муҳим.

Ватани қанчалик муҳим аҳамият касб этиши ҳақида

Ватанимни жуда яхши кўраман. Мен учун мамлакат ҳам, Ўзбекистон терма жамоаси ҳам жуда муҳим. Терма жамоага чақирилган вақтимда ватанимга бораман, ёки таътил пайтида. Бошқа пайтда бунга вақт топа олмайман. Ўзбекистонни, ота-онамни соғинаман, албатта.

Илёс Зейтуллаевдан кейин А Сериядаги иккинчи ўзбекистонлик эканлигидан фахрланиши ҳақида

Албатта, бундан фахрланаман, бу жуда ёқимли. Лекин бизда ушбу даражада ўйнай оладиган футболчилар кўп. Уларнинг ҳам шу ерда ҳаракат қилишларини истардим. Имкон қадар кўпроқ ўйинчиларимизнинг Европада бўлишини хоҳлайман. Бу бутунлай бошқача футбол, ​​бошқа тезлик. Бу ерда ўрганиш мумкин бўлган кўп нарса бор. Футболчиларимиз Европада қанча кўп бўлса, терма жамоага шунчалик яхши бўлади.

«Ростов»даги фаолияти ҳақида

Биринчи йил унчалик яхши ўтмаган. Мослашув жараёни бўлганди. Кейин кўникиб кетдим. Бутунлай бошқача футбол бўлган, нисбатан, Европага яқинроқ. Бош мураббий Валерий Карпин катта ёрдам берган, у ўзимга бўлган ишончимнинг ошишида катта иш қилган ва ҳаммаси яхши ривожланган.

«Женоа»га ўтиш ва яна бошқа мамлакатга кўчиш ҳақида

«Ростов»да охирги йилларни жуда яхши ўтказдим. Фақат охирги олти ой давомида ёмон ўйнадим. Бунинг ўзига яраша сабаблари бор эди. Лекин Европада ўйнаш истаги сўнмаган. Осон бўлмади. Гол урмаганингиздан кейин Европага чиқиш қийин. Аммо «Женоа» менга ишонди, бунинг учун клубга раҳмат. Улар мени «Ростов»дан сотиб олди. У ерга ўтишга рози бўлдим, чунки бу Европада ўйнаш орзум сари илк қадам эди.

Топ-клубда эмас, балки таркибга киришим мумкин бўлган жойдан бошлаш муҳим бўлган. Биринчи йил оғир ўтди. Россия ва Ўзбекистонда менталитет ўхшаш, Европада эса бутунлай бошқача. Шунинг учун, дастлабки икки-уч ой осон бўлмади, аммо кейин кўникишни бошладим. Ҳозир бу ердагилар қандай фикрлаши ҳақида яхши тасаввурга эгаман.

Мамлакатлар маданияти орасидаги фарқ ҳақида

Россия ва Ўзбекистонда ҳамма нарса ҳафтасига етти кун ишлайди. Бу ерда эса шанба ва якшанба кунлари ҳеч нарса ишламайди, ҳамма дам олади. Бутунлай бошқа маданият, бошқа тил. Одамлар ҳам бошқача ўйлайди.

Италиядаги футбол Россия ва Ўзбекистондагидан нимаси билан фарқ қилиши ҳақида

Аввало, бу ерда юқори тезлик ҳукм суради. Италияда кучга асосланган футбол устунлик қилади. Футболчиларнинг маҳорати ҳам, албатта, юқорироқ.

Янги босқичга чиқиш учун нима қилгани ҳақида

Аввало, тезлик қўшиш муҳим эди. Фақат ҳаракатда эмас, балки фикрлашда ҳам. Италияга кўчиб ўтганимда, хотиржам ўйнаб кетаман деб ўйлагандим, лекин машғулотлардаёқ кечикаётганимни ҳис қила бошладим. Ҳимоячилар мени ёпиб қўярди, доимо оёғимга зарба қабул қилардим ва бу борада нимани қўшишим кераклигини аниқ тушуниб етдим.

Қайси фазилатлари унга муваффақият олиб келгани ҳақида

Қийин савол. Менимча, бу биринчи навбатда сабр-тоқатга боғлиқ. Бошида қийин бўлганида, ўзимга бу менинг даражам эмаслигини айтиб, орқага қайтишим мумкин эди. Лекин сабр қилдим. Ҳаммаси амалга ошишини билардим. Сабр қилганим учун ҳозир ишларим жойида.

«Рома» ўз сафига қўшиб олмоқчи эканини билганида нималарни ҳис қилгани ҳақида

Менталитетимни ўзгартиришим кераклигини тушунганман. Ҳар бир ўйинга ғалаба қозониш ҳақидаги ўйлар билан тушиш керак. Жамоа ўз олдига юксак мақсадлар қўйишини билардим. Бу ерда рақобат ҳам анча жиддий. Ҳар бир учрашувда ўзингнинг таркибга лойиқ эканингни исботлашинг керак.

Жозе Моуриньо билан бирга ишлаш қандайлиги ҳақида

У ўз олдига катта мақсадлар қўйгани ва шу мақсадларни амалга оширишга киришгани илк кунлардан маълум бўлди. Ўйин ва интизом борасида жуда талабчан. У ҳар бир ўйинда ғалаба қозонишни истайди ва ўйинчиларнинг ҳам шунга интилишига ҳаракат қилади.

Моуриньонинг ўз вақтида Дрогбани дунёнинг энг яхши ҳужумчисига айлантиргани ва ҳозирда унга қандай ёрдам бераётгани ҳақида

Ҳозир кўпроқ тактика устида ишлаяпмиз. У бизга кўп нарсаларни кўрсатади ва ҳар бир ўйинда боримизни беришимизни талаб қилади. Албатта, ўз навбатида кўпроқ гол уришимизни ҳам сўрайди.

Конференциялар Лигасидаги голидан кейин нималарни ҳис қилгани ҳақида

Бу «Рома» сафидаги илк расмий ўйиним эди (УЕФА Конференция Лигаси плей-офф босқичидан ўрин олган «Трабзонспор»га қарши сафарда кечган ўйин). Менимча, ўшанда мени алмаштиришга тайёргарлик кўришаётганди. Дебют учрашувимда гол урганимдан ва жамоага Конференция Лигасига чиқиш имкониятини берганимдан хурсанд бўлганман. Бу жуда ёқимли туйғулар.

Ўша голини бувисига бағишлагани ҳақида

Ўша кунларда унинг туғилган куни эди. Бувимни шу тарзда табрикламоқчи эдим. У мени ҳар доим қўллаб-қувватлайди, барча ўйинларимни кузатиб боради. Бутун оилам — ота-онам, бувим ва рафиқам ҳар доим ўйинларимни кузатади ва қўллаб-қувватлайди.

Ушбу мавсумда ўз олдига қандай шахсий ва жамоавий мақсадлар қўйгани ҳақида

Биринчи навбатда — Чемпионлар Лигаси йўлланмасини қўлга киритиш ва Конференциялар Лигасида ғалаба қозониш. Булар асосий мақсадларимиз. Шахсий амбицияларга келсак, улар доимо жамоаники билан боғлиқ. Жамоага ғалаба қозониш ва совринларни қўлга киритишда ёрдам бермоқчиман. Жамоа ғалаба қозонса, сиз ҳам ғалаба қозонасиз.

Элдор Шомуродов, футболчи