Maurisio Pochettino Chempionlar Ligasida “Real”ga qarshi o‘yinlardagi mag‘lubiyatsiz seriyasini davom ettirdi

Futbol bo‘yicha Chempionlar Ligasi 1/8 finalida “Real” 0:1 hisobida “PSJ”ga imkoniyatni boy berdi.

“PSJ” zarbalar borasida 22:3 hisobida katta ustunlikka ega bo‘ldi. Ulardan 8 tasi aniq bo‘lgan, madridliklar esa birorta aniq zarba yo‘llay olmagan.

Parijliklar bosh murabbiyi Maurisio Pochettino Chempionlar Ligasi doirasida uchinchi bor “Madrid” klubi bilan to‘qnash keldi. Ularning ikkitasida g‘alaba qozongan va bittasida durang o‘ynagan.

2017/18-yilgi mavsumda argentinalik mutaxassis qo‘l ostida “Tottenhem” “Real” bilan bir guruhga tushgan. Madridda bo‘lib o‘tgan o‘yinda durang natija qayd etilgan bo‘lsa, Londonda “shporlar”ning qo‘li baland kelgan.

Pochettino umumiy hisobda Chempionlar Ligasida ispan jamoalariga qarshi yetti marta o‘yin o‘tkazgan. Bittasida mag‘lubiyatga uchragan, uchta bahsda durang natija qayd etilgan, qolgan uch uchrashuvda g‘alaba nashidasini surgan.