O‘zbekistonda 2006-yili giyohvand moddalarini sotishga uringani sabab qo‘lga olingan va qamoqxonadan qochib ketgan shaxsga nisbatan sud hukmi o‘qildi, deb xabar beradi Oliy sud matbuot xizmati.
Ma’lumotlarga ko‘ra, fuqaro F.Usmanov 2006-yil 18-iyul kuni soat 13:00 larda Sirdaryo viloyati Yangiyer shahar hududida kontrabanda yo‘li bilan olib kelingan, 553,44 gramm geroin giyohvandlik vositasini tanishi N.Yamaliyeva bilan 3,5 ming dollarga sotmoqchi bo‘lganida qo‘lga olingan. Shundan so‘ng ularning ikkalasiga ham qamoqqa olish ehtiyot chorasi qo‘llanilgan.
F.Usmanov kasalligi sababli qo‘riqlov ostida Yangiyer shahridagi markaziy shifoxonasida davolanayotganida, ichki ishlar organlari xodimlariga shar’iy nikohdan o‘tgan turmush o‘rtog‘i I.Doljenko ularning ovqatlanishi uchun borsh ovqatini tayyorlab kelgan. Ayol ushbu ovqat ichiga “Dimedrol” dorisini qo‘shib, ichki ishlar organlari xodimlarini ovqatlantirishi natijasida xodimlar uxlab qolgan. Fursatdan foydalangan F.Usmonov 2006-yil 19-avgust kuni davolanayotgan joyidan noma’lum tomonga qochib ketgan
Ushbu harakatlari uchun F.Usmanovga ko‘maklashgan N.Yamaliyeva 2006-yil 15-sentabrda, I.Doljenko esa 2006-yil 19-dekabrda javobgarlikka tortilgan.
Huquqni muhofaza qiluvchi organlari xodimlarining sa’y-harakatlari natijasida F.Usmanov Qozog‘istonda boshqa jinoyati uchun jazosini o‘tab bo‘lganidan so‘ng 2021-yil mart oyida ushlanib, O‘zbekistonga olib kelingan.
Sud mazkur jinoyat ishini 2021-yil 3-dekabr kuni mazmunan ko‘rib chiqib, F.Usmanovga Jinoyat kodeksining 222-moddasi (qamoqdan yoki qo‘riqlov ostidagi saqlash joyidan qochish) 2-qismi “v” bandi, 28, 246-moddalari (jinoyat ishtirokchilarining turlari, kontrabanda) 2-qismi va 25, 273-moddalari (jinoyatga tayyorgarlik ko‘rish va jinoyat sodir etishga suiqasd qilish), 5-qismi bilan 12 yil muddatga ozodlikdan mahrum qilish jazosini tayinlab, Jinoyat kodeksining 34-moddasiga (retsidiv jinoyat) asosan uni o‘ta xavfli retsidivist deb topgan.
Izoh (0)