Ўзбекистонда 2006 йили гиёҳванд моддаларини сотишга урингани сабаб қўлга олинган ва қамоқхонадан қочиб кетган шахсга нисбатан суд ҳукми ўқилди, деб хабар беради Олий суд матбуот хизмати.
Маълумотларга кўра, фуқаро Ф.Усманов 2006 йил 18 июль куни соат 13:00 ларда Сирдарё вилояти Янгиер шаҳар ҳудудида контрабанда йўли билан олиб келинган, 553,44 грамм героин гиёҳвандлик воситасини таниши Н.Ямалиева билан 3,5 минг долларга сотмоқчи бўлганида қўлга олинган. Шундан сўнг уларнинг иккаласига ҳам қамоққа олиш эҳтиёт чораси қўлланилган.
Ф.Усманов касаллиги сабабли қўриқлов остида Янгиер шаҳридаги марказий шифохонасида даволанаётганида, ички ишлар органлари ходимларига шаръий никоҳдан ўтган турмуш ўртоғи И.Долженко уларнинг овқатланиши учун борш овқатини тайёрлаб келган. Аёл ушбу овқат ичига «Димедрол» дорисини қўшиб, ички ишлар органлари ходимларини овқатлантириши натижасида ходимлар ухлаб қолган. Фурсатдан фойдаланган Ф.Усмонов 2006 йил 19 август куни даволанаётган жойидан номаълум томонга қочиб кетган
Ушбу ҳаракатлари учун Ф.Усмановга кўмаклашган Н.Ямалиева 2006 йил 15 сентябрда, И.Долженко эса 2006 йил 19 декабрда жавобгарликка тортилган.
Ҳуқуқни муҳофаза қилувчи органлари ходимларининг саъй-ҳаракатлари натижасида Ф.Усманов Қозоғистонда бошқа жинояти учун жазосини ўтаб бўлганидан сўнг 2021 йил март ойида ушланиб, Ўзбекистонга олиб келинган.
Суд мазкур жиноят ишини 2021 йил 3 декабрь куни мазмунан кўриб чиқиб, Ф.Усмановга Жиноят кодексининг 222-моддаси (қамоқдан ёки қўриқлов остидаги сақлаш жойидан қочиш) 2-қисми «в» банди, 28, 246-моддалари (жиноят иштирокчиларининг турлари, контрабанда) 2-қисми ва 25, 273-моддалари (жиноятга тайёргарлик кўриш ва жиноят содир этишга суиқасд қилиш), 5-қисми билан 12 йил муддатга озодликдан маҳрум қилиш жазосини тайинлаб, Жиноят кодексининг 34-моддасига (рецидив жиноят) асосан уни ўта хавфли рецидивист деб топган.
Изоҳ (0)