Sudyalar Oliy kengashining tegishli qarorlari bilan yana uch nafar sudya vazifasidan ozod etildi. Bu haqda Sudyalar Oliy kengashi matbuot xizmati “Daryo”ga ma’lum qilmoqda.
Qayd etilishicha, Andijon viloyati jinoyat ishlari bo‘yicha Andijon shahar sudining raisi R.Turginov va Samarqand viloyati jinoyat ishlari bo‘yicha Jomboy tuman sudining raisi M.Sheryigitov yozma arizalariga binoan, Buxoro viloyati sudining fuqarolik ishlari bo‘yicha sudyasi Sh.Ne’matov esa sudyalik qasamyodini buzgani uchun lavozimidan ozod etilib, vakolati muddatidan ilgari tugatilgan.
Bundan tashqari, mas’uliyatsizligi va faoliyatida yo‘l qo‘ygan kamchiliklari uchun Xorazm viloyati jinoyat ishlari bo‘yicha Xonqa tuman sudining raisi M.Hasanova hamda Navoiy viloyati fuqarolik ishlari bo‘yicha Karmana tumanlararo sudining raisi Sh.Togoyev intizomiy javobgarlikka tortilgan.
Ta’kidlanishicha, 2022-yilning o‘tgan davri mobaynida jami 8 nafar sudya vazifasidan ozod etilgan.
Avvalroq O‘zbekistonda 2021-yilda 38 nafar sudyaning vakolati muddatidan ilgari tugatilgani, Toshkentda mas’uliyatsizlikka yo‘l qo‘ygan 9 nafar sudya javobgarlikka tortilgani, shu viloyatida pora olgan sudyaga nisbatan jinoyat ishi qo‘zg‘atilgani xabar qilingandi.
Izoh (0)