«Охирги марта қачон тиббий ниқоб сотиб олдингиз?» – «Дарё»да кичик сўровнома

Ўзбекистонга коронавирус кириб келганидан сўнг карантин чекловлари киритилиб, маска режими жорий қилинган эди. Ўтган икки йил ичида чекловлар енгиллаштирилган бўлса-да, жамоат жойлари ва кўчада ниқобда бўлиш талаби бекор қилинмади.

Январь ойида касалланиш бўйича антирекордлар кунора янгиланди. Аммо сўнгги ойларда тиббий ниқобда юрган одамларни ҳар қадамда ҳам учратавермайсиз.

Одамлар охирги маротаба қачон тиббий ниқоб сотиб олган? Бу бўйича «Дарё» пойтахтликлар ўртасида кичик сўровнома ўтказди.

Сўровномада қатнашганларнинг деярли кўпчилиги ниқоб тақмаган. Аммо ёнларида тиббий ниқоблари бор эканини айтиб ўтди. Фуқароларнинг таъкидлашича, ниқобни бир олганда захира билан олиб қўйган ва ҳар куни сотиб олишга ҳожат йўқ.

«Бир ҳафта олдин сотиб олганман, алмаштирмай фойдаланаман. Ҳар куни сотиб олиш тўғри келмайди», — дея қайд этди сотувчи аёл.

Таксичининг айтишича, пандемия бошланганда олгани бўйича бошқа сотиб олмаган, ҳали ҳам етиб турибди.

«Сумкамда бор, мен ниқобимни ювиб-ювиб ишлатаман», — дейди харидор аёл.

Таъкидлаш керакки, Ўзбекистонда 18 январдан буён кунлик касалланиш ҳолати минг кишидан ортаётганди. 22 январь куни эса рекорд кўрсаткичга чиққанди — бир суткада 1478 кишида коронавирус аниқланган. 2 февралда эса коронавирус билан кунлик касалланишлар сони 15 кун ичида илк бор 1000 тадан камайган. 9 февралдан бошлаб мамлакатда коронавирус билан кунлик касалланишлар сони бир ой ичида илк бор 700 тадан камайди.