Судьялар Олий кенгашининг тегишли қарорлари билан яна уч нафар судья вазифасидан озод этилди. Бу ҳақда Судьялар Олий кенгаши матбуот хизмати «Дарё»га маълум қилмоқда.
Қайд этилишича, Андижон вилояти жиноят ишлари бўйича Андижон шаҳар судининг раиси Р.Тургинов ва Самарқанд вилояти жиноят ишлари бўйича Жомбой туман судининг раиси М.Шерйигитов ёзма аризаларига биноан, Бухоро вилояти судининг фуқаролик ишлари бўйича судьяси Ш.Неъматов эса судьялик қасамёдини бузгани учун лавозимидан озод этилиб, ваколати муддатидан илгари тугатилган.
Бундан ташқари, масъулиятсизлиги ва фаолиятида йўл қўйган камчиликлари учун Хоразм вилояти жиноят ишлари бўйича Хонқа туман судининг раиси М.Ҳасанова ҳамда Навоий вилояти фуқаролик ишлари бўйича Кармана туманлараро судининг раиси Ш.Тогоев интизомий жавобгарликка тортилган.
Таъкидланишича, 2022 йилнинг ўтган даври мобайнида жами 8 нафар судья вазифасидан озод этилган.
Аввалроқ Ўзбекистонда 2021 йилда 38 нафар судьянинг ваколати муддатидан илгари тугатилгани, Тошкентда масъулиятсизликка йўл қўйган 9 нафар судья жавобгарликка тортилгани, шу вилоятида пора олган судьяга нисбатан жиноят иши қўзғатилгани хабар қилинганди.
Изоҳ (0)