Qashqadaryo viloyat prokuraturasi Muborak tuman IIBning sobiq boshlig‘i X.B.ning 50 ming dollar bilan qo‘lga olingan hokim yordamchisiga aloqadorlikda gumonlanib, qo‘lga olinganini tasdiqladi. Bu haqda jamoatchilikka ma’lum qilgan viloyat prokuraturasi tuman IIB boshlig‘i uning qilmishlarini fosh etuvchi barcha dalillar to‘planganidan so‘ng, 2022-yilning 11-fevral kuni qo‘lga olinganini bildirgan.
“Jinoyat ishi yuzasidan o‘tkazilgan dastlabki tergovda ichki ishlar organlari kadrlar zahirasidagi xodim — U.Ya. pora olish jinoyatini tanishi Muborak tuman IIB boshlig‘i X.B. bilan oldindan jinoiy til biriktirgan holda sodir etgani aniqlangan. Dastlabki tergov organi tomonidan Muborak tuman IIB boshlig‘i X.B.ning sodir etilgan jinoyatga bevosita daxldorligini isbotlovchi yetarli dalillar to‘plangach, u 2022-yil 11-fevral kuni jinoyat ishida gumonlanuvchi sifatida jalb qilinib, shu kuni Jinoyat prossessual kodeksining 221-moddasi tartibida ushlangan”, — deyiladi mas’ul tashkilot axborotida.Qo‘shimcha qilishicha, viloyat prokurori farmoyishiga muvofiq prokuratura va ichki ishlar idoralarida jinoyatchilikning oldini olish va ularning yuzaga kelishiga sabab bo‘layotgan omillarni bartaraf etish maqsadida ishchi guruh tuzilgan.
“Ishchi guruh 2022-yilning 7—10-fevral kunlari Muborak tuman prokuraturasi va ichki ishlar bo‘limining bu boradagi faoliyatini tahlil qilgan. O‘rganishlar davomida, tuman IIBning tergovga qadar tekshirish, dastlabki tergov va jinoyatlarni fosh etish bo‘yicha faoliyatida bir qator kamchiliklar, xususan, o‘g‘irlik, bezorilik, talonchilik va firibgarlik kabi jinoyatlarni hisobdan yashirish holatlari aniqlangan”, — deydi mas’ul tashkilot axborot xizmati rahbari.
Sohib G‘aybullayevga ko‘ra, jinoyat sodir etilganini ko‘rsatuvchi holatlar aniqlangach, bunga dahldor bo‘lgan IIB xodimlaridan tushuntirishlar olingan.
“Jinoyati fosh bo‘lgach, buni yashirishga uringan IIB xodimlari javobgarlikdan qutilish maqsadida ommaviy axborot vositalarida yolg‘on ma’lumot tarqatib, aholini chalg‘itishga harakat qilgan”, — deydi viloyat prokuraturasi mas’uli.
Viloyat prokuraturasining aniqlashicha, Muborak tumanida hisobdan yashirilgan uchta o‘g‘rilik, uchta bezorilik, bitta talonchilik va bitta firibgarlik jinoyatlari bo‘yicha jinoyat ishlari qo‘zg‘atilgan.
Izoh (0)