«Жиноятини яширишга уринганлар жавобгарликдан қутилиш мақсадида ОАВда ёлғон маълумот тарқатган». Қашқадарё прокуратураси собиқ ИИБ мансабдорининг қўлга олиниши ҳақида ёзди

Қашқадарё вилоят прокуратураси Муборак туман ИИБнинг собиқ бошлиғи Х.Б.нинг 50 минг доллар билан қўлга олинган ҳоким ёрдамчисига алоқадорликда гумонланиб, қўлга олинганини тасдиқлади. Бу ҳақда жамоатчиликка маълум қилган вилоят прокуратураси туман ИИБ бошлиғи унинг қилмишларини фош этувчи барча далиллар тўпланганидан сўнг, 2022 йилнинг 11 февраль куни қўлга олинганини билдирган.

«Жиноят иши юзасидан ўтказилган дастлабки терговда ички ишлар органлари кадрлар заҳирасидаги ходим — У.Я. пора олиш жиноятини таниши Муборак туман ИИБ бошлиғи Х.Б. билан олдиндан жиноий тил бириктирган ҳолда содир этгани аниқланган. Дастлабки тергов органи томонидан Муборак туман ИИБ бошлиғи Х.Б.нинг содир этилган жиноятга бевосита дахлдорлигини исботловчи етарли далиллар тўплангач, у 2022 йил 11 февраль куни жиноят ишида гумонланувчи сифатида жалб қилиниб, шу куни Жиноят проссессуал кодексининг 221-моддаси тартибида ушланган», — дейилади масъул ташкилот ахборотида.

Қўшимча қилишича, вилоят прокурори фармойишига мувофиқ прокуратура ва ички ишлар идораларида жиноятчиликнинг олдини олиш ва уларнинг юзага келишига сабаб бўлаётган омилларни бартараф этиш мақсадида ишчи гуруҳ тузилган.

«Ишчи гуруҳ 2022 йилнинг 7—10 февраль кунлари Муборак туман прокуратураси ва ички ишлар бўлимининг бу борадаги фаолиятини таҳлил қилган. Ўрганишлар давомида, туман ИИБнинг терговга қадар текшириш, дастлабки тергов ва жиноятларни фош этиш бўйича фаолиятида бир қатор камчиликлар, хусусан, ўғирлик, безорилик, талончилик ва фирибгарлик каби жиноятларни ҳисобдан яшириш ҳолатлари аниқланган», — дейди масъул ташкилот ахборот хизмати раҳбари.

Соҳиб Ғайбуллаевга кўра, жиноят содир этилганини кўрсатувчи ҳолатлар аниқлангач, бунга даҳлдор бўлган ИИБ ходимларидан тушунтиришлар олинган.

«Жинояти фош бўлгач, буни яширишга уринган ИИБ ходимлари жавобгарликдан қутилиш мақсадида оммавий ахборот воситаларида ёлғон маълумот тарқатиб, аҳолини чалғитишга ҳаракат қилган», — дейди вилоят прокуратураси масъули.

Вилоят прокуратурасининг аниқлашича, Муборак туманида ҳисобдан яширилган учта ўғрилик, учта безорилик, битта талончилик ва битта фирибгарлик жиноятлари бўйича жиноят ишлари қўзғатилган.