Polkovnik Muhiddin Jo‘rayev Farg‘ona viloyati Ichki ishlar boshqarmasi boshlig‘i lavozimiga tayinlandi, deb xabar beradi IIV Ma’naviy-ma’rifiy ishlar va kadrlar bilan ta’minlash departamenti.
Tayinlovga qadar Muhiddin Jo‘rayev Toshkent shahar Ichki ishlar bosh boshqarmasi boshlig‘ining birinchi o‘rinbosari lavozimida xizmat qilgan. Shu kungacha Farg‘ona viloyati IIB boshlig‘i lavozimida Doniyor Toshxo‘jayev ishlab kelayotgandi.
Ma’lumot uchun, Muhiddin Jo‘rayev 2014—2016-yillarda Mirzo Ulug‘bek tumani IIB boshlig‘i, 2016—2018-yillarda Sirdaryo viloyat IIB boshlig‘i lavozimlarida ishlagan. U 2018-yilning dekabr oyi oxirida ichki ishlar vaziri o‘rinbosari lavozimiga tayinlangan edi. 2020-yilning sentabrida esa Toshkent shahar IIBB boshlig‘iga yangi o‘rinbosar bo‘lgandi. Shuningdek, 2019-yil iyulida O‘zbekiston futbol assotsiatsiyasi vitse-prezidenti lavozimini egallagan.
Avvalroq ijtimoiy tarmoqlarda Farg‘ona viloyati Quva tumani “Baynalminal” MFY profilaktika inspektori lavozimida ishlagan Nozimjon Nishonov ichki ishlar vaziri Po‘lat Bobojonov va IIV Shaxsiy xavfsizlik bosh boshqarmasi boshlig‘i Muxtor Mirzayevga videomurojaat bilan chiqqandi. Murojaat davomida u Quva tuman IIB boshlig‘i o‘rinbosari mayor Ahmadjonov profilaktika inspektorlariga nisbatan noqonuniy xatti-harakatlari yuzasidan shikoyat qilgan.
Ichki ishlar vazirining matbuot kotibi Shohrux G‘iyosov mazkur holatga munosabat bildirib, Quva tumani IIB rahbariyatining noqonuniy harakatlari bo‘yicha tarqatayotgan vajlar o‘rnatilgan tartibda tekshirilib, holatga huquqiy baho berilishini ma’lum qilgan edi.
Izoh (0)