OTB O‘zbekistonda kasb-hunar ta’limini yaxshilash uchun 93 mln dollar ajratadi

O‘zbekiston Osiyo taraqqiyot banki bilan birgalikda “Zamonaviy iqtisodiyot uchun ko‘nikmalarni rivojlantirish” loyihasini amalga oshirishga kirishmoqda. Bu haqda Bandlik va mehnat munosabatlari vazirligiga tayanib, Spot xabar qildi.

Qayd etilishicha, Vazirlar Mahkamasining 2-fevraldagi qarori bilan loyihani amalga oshirish rejasi tasdiqlangan. Uni amalga oshirish bilan O‘zbekiston tomonidan Mehnat vazirligi va Oliy ta’lim vazirligi shug‘ullanadi.

Loyiha budjeti 162 million dollarni tashkil etadi, shundan 93 million dollari OTB mablag‘lari hisobidan ajratiladi.

Ushbu tashabbus mehnat bozori va kasb-hunar ta’limi tizimi o‘rtasidagi aloqani mustahkamlaydi. Bundan tashqari, bu ishsizlar va yoshlarni kasb-hunarga o‘qitish sifatini oshirishga, bandlik va ish beruvchilar qoniqishini oshirishga xizmat qiladi.

Mutaxassislarning fikricha, O‘zbekiston iqtisodiyoti barqaror o‘sib borayotganiga qaramay, malakali kadrlar yetishmasligi uning rivojlanishi va xorijiy sarmoyalarni jalb etishiga to‘sqinlik qilmoqda (buni Jahon banki ham ta’kidlagan).

OTB ma’lumotlariga ko‘ra, firmalarning 35 foizi o‘sish uchun to‘siq sifatida malaka yetishmasligini ko‘rsatadi. Sanoat korxonalarining 49 foizi malakali ishchilarni topishda muammolarga duch kelmoqda.

Hukumat kasb-hunar ta’limi va kadrlar tayyorlashni takomillashtirish bo‘yicha qator chora-tadbirlarni amalga oshirgan. Ushbu loyiha ularni amalga oshirishni qo‘llab-quvvatlash maqsadida ishlab chiqilgan, deya ta’kidlaydi vazirlik.

Loyiha Mehnat vazirligi tizimidagi 14 ta kasb-hunarga o‘qitish markazi hamda 6 ta kollej va texnikumning infratuzilmasini yaxshilashga xizmat qiladi. Ularga zamonaviy o‘quv va o‘quv-ishlab chiqarish uskunalari, ta’mirlash ustaxonalari xarid qilinadi.

Bundan tashqari, kasb-hunar ta’limi tashkilotlari uchun o‘quv dasturlari, talablar va standartlar ishlab chiqiladi. Kasbiy malaka oshirish bo‘yicha milliy va tarmoq kengashlari tashkil etiladi.

Shuningdek, 2021-yil oktabr oyida tashkil etilgan Mehnat bozorini o‘rganish institutining salohiyatini kuchaytirish rejalashtirilgan. Ushbu qadam mehnat bozori to‘g‘risidagi ma’lumotlarni to‘plash va tahlil qilishni, shuningdek, ishchi kuchiga bo‘lgan talabni prognoz qilishni yaxshilashga yordam beradi.

Loyiha aholining ijtimoiy himoyaga muhtoj qatlamlarini, xususan, ayollar va imkoniyati cheklangan shaxslarni kasbga o‘qitishni qo‘llab-quvvatlaydi. Bundan tashqari, o‘qituvchilar, instruktorlar va ishlab chiqarish ta’limi ustalari o‘z malakalarini oshiradilar.

Loyiha kamida quyidagilarga yordam berishi kutilmoqda:

• 10 ming nafar texnikum va kasb-hunar talabasi;
• 48 ming ish izlovchi, shu jumladan, 500 nafar nogironligi bor shaxs;
• kollejlar va texnikumlardagi 600 nafar ixtisoslashtirilgan o‘qituvchi;
• ushbu muassasalarning 100 nafar rahbar va xodimi;
• davlat bandlik xizmati tizimidagi 1200 nafar xodim va 210 nafar rahbar.