O‘zbekistonning 3 ta hududida tadbirkorlarning mulkini o‘zlashtirgan moddiy javobgar shaxslar aniqlandi. Bu haqda Iqtisodiy jinoyatlarga qarshi kurashish departamenti xabar qildi.
Qayd etilishicha, Bosh prokuratura huzuridagi departamentning Toshkent shahar Chilonzor tuman bo‘limi tomonidan tadbirkorlik sub’ektlarining huquqlarini himoya qilish yuzasidan tergovga qadar tekshiruv o‘tkazilgan. Unda R.A. MChJ kassiri J.F. o‘ziga ishonib topshirilgan aviabilet va turizm yo‘llanmalari savdosidan tushgan 1,2 milliard so‘mni o‘zlashtirish yo‘li bilan talon-toroj qilgani aniqlangan.
Shuningdek, departamentning Xorazm viloyati Qo‘shko‘pir tuman bo‘limi tomonidan tergovga qadar tekshiruv o‘tkazilgan. Unda R.S. ismli shaxs X.A. MChJning jami 421,1 million so‘mlik (53 bosh chorva moli va qishloq xo‘jaligi uskunalari) mulkini o‘zlashtirish yo‘li bilan talon-toroj qilgani aniqlangan.
Bundan tashqari, departamentning Nukus shahar bo‘limi tomonidan ham tergovga qadar tekshiruv o‘tkazilgan. Unda B.A. MChJning moddiy javobgar shaxslari o‘zlariga ishonib topshirilgan 200 million so‘mlik maishiy texnikalarni o‘z manfaatlari yo‘lida ishlatib, o‘zlashtirish yo‘li bilan talon-toroj qilgani ma’lum bo‘lgan.
Holatlar yuzasidan Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) bilan jinoyat ishlari qo‘zg‘atilib, tergov harakatlari o‘tkazilmoqda.
Mavzuga doir:
Izoh (0)