Toshkentdagi Mehribonlik uyida tarbiyachi bolani urib, tan jarohati yetkazdi

Toshkent shahrida joylashgan 21-sonli Mehribonlik uyida tarbiyalanayotgan bola tarbiyachi tomonidan kaltaklandi. Bu haqda O‘zA xabar qilmoqda.

Qayd etilishicha, yanvar oyida Bola huquqlari bo‘yicha vakil nomiga Mehribonlik uyida tarbiyalanayotgan A. ismli bolaga B. ismli erkak tarbiyachisi kuch ishlatib, jismoniy tazyiq o‘tkazayotgani haqida ma’lumot kelib tushgan. Bola huquqlari bo‘yicha vakil ushbu holat yuzasidan o‘rganish o‘tkazgan.

Tarbiyalanuvchi A. bilan suhbat o‘tkazilganda yuqoridagi holatlarni tasdiqlagan. Uning o‘ng tirsak sohasi lat yeb, ko‘kargani ma’lum bo‘lgan.

Bolaning so‘zlariga ko‘ra, navbatchi tarbiyachi yuqoridagi holat bo‘lishidan oldin ham bir necha marotaba uning tanasining turli joylariga urib tan jarohati yetkazgan. Biroq u qo‘rquv ostida ushbu holatlar haqida hech kimga murojaat qilmagan.

Monitoring jarayonida tarbiyalanuvchining tanasi shifokorlar ishtirokida ko‘zdan kechirilgan. Natijada bolaning tanasida ko‘kargan yaralar borligi, bosh qismida ham og‘riq mavjudligi aniqlangan.

Tarbiyalanuvchi A. navbatchi hamshiraning oldiga tushib, o‘ng qo‘lining lat yeb, ko‘kargan tirsak qismiga surtma dori surdirganlik holati “Ambulator jurnali”da qayd etilmagani ma’lum bo‘lgan.

Bosh prokuraturaga holatni o‘rganib, voyaga yetmagan shaxsga nisbatan tan jarohati yetkazilganiga huquqiy baho berish so‘ralgan.

Shuningdek, kelgusida A.ga nisbatan bo‘lishi mumkin bo‘lgan turli xil tazyiqlarning oldini olish maqsadida navbatchi tarbiyachini mehnat qonunchiligiga muvofiq vaqtinchalik ishdan chetlatish masalasi ko‘rib chiqilishi uchun Xalq ta’limi vazirligiga xat kiritilgan.