Andijon viloyatining Shahrixon tumanidagi “Qorako‘rpa” mahallasida joylashgan xususiy shifoxonada gaz portlashi sodir bo‘lgani, oqibatda bir kishi vafot etgani xabar berilgandi. Voqea tafsilotlarini o‘rgangan “Daryo” muxbirining yozishicha, binodagi portlashga skotchlangan gaz balloni hamda gaz so‘rg‘ichlari sabab bo‘lgan bo‘lishi mumkin.
Shahrixon tuman Favqulodda vaziyatlar bo‘limi boshlig‘i o‘rinbosari, podpolkovnik Jobir Siddiqovning ma’lum qilishicha, portlash haqida bo‘limga soat 11:30 da xabar berilgan. Shundan so‘ng voqea joyiga ikkita qutqaruv ekipaji yuborilgan.
Favqulodda vaziyatlar vazirligi Andijon viloyati boshqarmasining Ommaviy axborot vositalari va jamoat tashkilotlari bilan hamkorlik qilish guruhi boshlig‘i, mayor Sardor Zulunovning qo‘shimcha qilishicha, qidiruv ishlari davomida tan jarohati olgan to‘rt nafar fuqaro shifoxonaga joylashtirilgan, shuningdek, bir nafar fuqaroning vafot etgani aniqlangan. Holat yuzasidan dastlabki, tergovga qadar surishtiruv ishlari amalga oshirilmoqda.
“Daryo” muxbiri bilan suhbatlashgan Shahrixon tuman tibbiyot birlashmasi markaziy shifoxonasining qabulxona-diagnostika bo‘limi mudiri Otabek Ahliddinovning ma’lumot berishicha, o‘sha kuni shifoxonaga 11 nafar bemor olib kelingan.
“Tez yordam mashinalarida olib kelingan bemorlarga olgan tan jarohatining og‘ir yoki yengilligiga qarab yordam ko‘rsatildi. Yengil jarohat olgan fuqarolar nazoratda bo‘lishi uchun ularga ambulator ravishda yashash joyiga javob berilgan. To‘liq tekshiruvdan o‘tkazilishi kerak bo‘lgan to‘rt nafar bemor esa shifoxonada olib qolinib, ular bilan davolash ishlari olib borilmoqda. O‘rta og‘irlikdagi bir nafar bemor viloyat sog‘liqni saqlash boshqarmasi boshlig‘i tashabbusi bilan respublika shoshilinch tibbiy yordam ilmiy markazi viloyat filialiga o‘tkazildi”, — deydi Otabek Ahliddinov.
Portlashdan jarohatlangan Muhabbat Boymatovaning aytishicha, u o‘sha kuni ertalab opasi Muqaddam Boymatova bilan markazga zuluk qo‘ydirish uchun borgan. Voqea yuz bergan vaqtda u davolanayotgan xonada uch ayol va bir erkak bo‘lgan.
“Mening ‘davleniyem’ bor, zuluk olsa ‘davleniye’ tushadi deyishgani uchun bu yerga birinchi marta kelgandim. Soat 09:25 larda zuluk qo‘ydirdim. Soat 10:30 da ishimizni tugatib, ketish harakatida edik. Birdan ‘qars’ etgan ovoz eshitilib, tepadan sement (beton plitalar) yorilib boshimizga tusha boshladi. O‘zimiz esa beton yorilib, pastga quladik. Xuddi yer yorildi-yu, zilziladan yer tagiga tushib ketgandek bo‘ldik. Hammayoq chang. Yerga tushib, engashib yotib qoldik. Ustimizga tepadan ko‘p narsa quladi. Shundan keyin shifoxonaga olib kelishganini bildim, xolos. Hozir holatim yaxshi”, — deydi Muhabbat Boymatova.
Portlash sodir bo‘lganda binoda bo‘lgan markaz shifokori Nabijon Esonov voqea yuz bergan paytda xonasida o‘tirganini, portlash ovozini eshitgach, qisqa vaqtda pastga qulab tushganini aytmoqda.
“Stulda o‘tirgandim. Juma namoziga chiqish uchun tayyorgarlik ko‘rayotgandim. Bangillagan ovoz eshitildi, keyin nima bo‘ldi bilmayman, o‘rnimdan tursam ‘podval’da yotgan ekanman. So‘ngra o‘rnimdan turib, derazadan oshib tushdim va ishchilarga yordam berdim”, — deydi Nabijon Esonov.
“Hududgaz Andijon” gaz ta’minoti filiali rahbarining birinchi o‘rinbosari, bosh muhandis Rahmatillo Temirov obyekt to‘liq gazlashtirilganini, chaqnash qanday yuz bergani bo‘yicha o‘rganish olib borilayotganini ma’lum qildi.
“Shifoxona tabiiy gaz bilan gazlashgan obyekt bo‘lib, texnik ijro hujjatlari hammasi qonuniylashtirilgan. Hozirda chaqnash holati qanday yuz bergani bo‘yicha o‘rganish ishlari olib borilmoqda va xulosasi bo‘yicha qo‘shimcha ma’lumot beriladi”, — deydi Rahmatillo Temirov.
Voqea guvohlaridan birining “Daryo” muxbiriga ma’lum qilishicha, tadbirkor binoni isitish maqsadida tabiiy gaz bilan birga skotch gaz ballonlaridan ham foydalangan. Shuningdek, binoning yer to‘la qismiga shlank orqali gaz o‘tkazilgan. Natijada yer to‘lada gaz dimlanib qolgan. Bundan tashqari binoni tozalash davomida gaz so‘rg‘ichlar ham topilgan.
Mavzuga doir:
Izoh (0)