Prezident Shavkat Mirziyoyev hududlar rivoji bilan yaqindan tanishish maqsadida Samarqand viloyatiga jo‘nab ketgani to‘g‘risida xabar berilgandi. Viloyatga yetib kelgan davlat rahbari Samarqand xalqaro aeroportida yaratilayotgan sharoitlarni ko‘zdan kechirdi, deb xabar beradi Prezident matbuot xizmati.
Ma’lumot uchun, ushbu aeroport qariyb 83 million dollarlik loyiha evaziga yangidan qurilmoqda. 2021-yili uchish-qo‘nish yo‘lagi qayta qurilgan edi. Bugungi kunda yangi terminal to‘liq tiklanib, pardozlash ishlari olib borilmoqda. Yo‘l, avtoturargoh va yoritish ustunlari barpo etilmoqda.
“Mirzo Ulug‘bekning buyuk merosi Samarqandning timsoliga aylangan. Shu bois yangi aeroport binosi alloma bobomizning “Ziji jadidi Ko‘ragoniy” kitobi shaklida barpo etilgan. Terminalning eni 175, balandligi 25 metr. Bir soatda 800 nafar yo‘lovchiga xizmat ko‘rsatish quvvatiga ega bo‘ladi”, — deyiladi xabarda.
Ta’kidlanishicha, aeroportda “ochiq osmon” rejimi qo‘llaniladi, kargo xizmati ham yo‘lga qo‘yiladi. Yangi terminal kelgusi oyda foydalanishga topshiriladi.
Ma’lumot uchun, Samarqand xalqaro aeroportiga keluvchi va undan ketuvchi 2021-yil 20-oktabrdan 20-noyabrgacha rejalashtirilgan reyslar aeroport rekonstruksiyasi tufayli bekor qilingandi. Keyinchalik Uzbekistan Airports aeroportining yopilishi dekabr oyining o‘rtalariga qadar uzaytirilganini ma’lum qilgandi. 10-dekabrdan esa aeroport ishga tushgan edi.
Izoh (0)