Президент Шавкат Мирзиёев ҳудудлар ривожи билан яқиндан танишиш мақсадида Самарқанд вилоятига жўнаб кетгани тўғрисида хабар берилганди. Вилоятга етиб келган давлат раҳбари Самарқанд халқаро аэропортида яратилаётган шароитларни кўздан кечирди, деб хабар беради Президент матбуот хизмати.
Маълумот учун, ушбу аэропорт қарийб 83 миллион долларлик лойиҳа эвазига янгидан қурилмоқда. 2021 йили учиш-қўниш йўлаги қайта қурилган эди. Бугунги кунда янги терминал тўлиқ тикланиб, пардозлаш ишлари олиб борилмоқда. Йўл, автотураргоҳ ва ёритиш устунлари барпо этилмоқда.
«Мирзо Улуғбекнинг буюк мероси Самарқанднинг тимсолига айланган. Шу боис янги аэропорт биноси аллома бобомизнинг «Зижи жадиди Кўрагоний» китоби шаклида барпо этилган. Терминалнинг эни 175, баландлиги 25 метр. Бир соатда 800 нафар йўловчига хизмат кўрсатиш қувватига эга бўлади», — дейилади хабарда.
Таъкидланишича, аэропортда «очиқ осмон» режими қўлланилади, карго хизмати ҳам йўлга қўйилади. Янги терминал келгуси ойда фойдаланишга топширилади.
Маълумот учун, Самарқанд халқаро аэропортига келувчи ва ундан кетувчи 2021 йил 20 октябрдан 20 ноябргача режалаштирилган рейслар аэропорт реконструкцияси туфайли бекор қилинганди. Кейинчалик Uzbekistan Airports аэропортининг ёпилиши декабрь ойининг ўрталарига қадар узайтирилганини маълум қилганди. 10 декабрдан эса аэропорт ишга тушган эди.
Изоҳ (0)