Andijon viloyati Marhamat tumanidagi maktablardan birida o‘qituvchilar o‘quv muassasasida ta’lim sifati, o‘quvchilarning oliygohlarga kirish ko‘rsatkichi pastligi, o‘quvchilarning o‘zlashtirishi qoniqarsiz ekani tufayli ota-onalar oldida tik turib, uzr so‘ragani xabar qilingandi. Ta’lim sifatini nazorat qilish davlat inspeksiyasining ma’lum qilishicha, tumandagi mazkur 72-IDUM ta’lim sifati eng past maktablar qatorida turmaydi.
Ta’kidlanishicha, Ta’lim inspeksiyasi ta’lim sifatida mavjud muammolar uchun pedagoglarni ayblash yoki behurmat qilishni qat’iyan qoralaydi.
“Marhamat tumanidagi ustozlar bilan sodir bo‘lgan holat esa vakolatli organlar tomonidan batafsil o‘rganib chiqilib, aybdorlarga qat’iy chora ko‘rish maqsadga muvofiq. 9-maktab (hozirgi 72-IDUM) reytingda respublika bo‘yicha 9622 ta maktab o‘rtasida 5144-o‘rinni, tumandagi 45 ta maktab o‘rtasida 23-o‘rinni egallagan. Ya’ni past natija qayd etmagan”, — deyiladi munosabatda.
Ma’lum qilinishicha, hukumat qarori bilan tasdiqlangan umumiy o‘rta ta’lim muassasalari reytingini aniqlash tartibi to‘g‘risidagi nizomga asosan maktablar reytingi aniqlashda quyidagi 8 ta ko‘rsatkich inobatga olinadi:
2021-yili ilk marotaba e’lon qilingan maktablar reytingi Prezident topshirig‘iga asosan avvalo hokimlar hamda ularning ta’lim va tarbiya masalalari bo‘yicha maslahatchilari faoliyatini baholash maqsadida aniqlab e’lon qilingan. Hech bir huquqiy me’yoriy hujjatda maktablar reytingida past natija ko‘rsatgan maktab pedagoglariga chora ko‘rish bo‘yicha normalar mavjud emas. Ya’ni ushbu maktablarni jazolash emas, balkim ta’lim sifatini oshirish bo‘yicha ularga yordam berish maqsad qilingan.
Qayd etilishicha, maktablar reytingi jazolash emas, aksincha, rag‘batlantirishni ko‘zda tutadi. Ya’ni prezident farmoniga ko‘ra:
- tuman (shahar) kesimida tuzilgan reytingda birinchi o‘rinni egallagan umumta’lim muassasalari direktorlari mahalliy budjet mablag‘lari hisobidan mehnatga haq to‘lash eng kam miqdorining 10 baravari miqdorida bir martalik rag‘batlantiriladi;
- xalq ta’limi bo‘limi mudirlari va metodistlariga, umumta’lim muassasalari direktorlariga hamda tuman (shahar) kesimida tuzilgan reytingda birinchi beshta o‘rinlarni egallagan umumta’lim muassasalarining 2 nafar o‘qituvchilariga O‘zbekiston Kasaba uyushmalari Federatsiyasi hisobidan sanatoriylarda dam olish uchun bepul yo‘llanmalar beriladi.
Izoh (0)