Хитой АҚШдан Тайванга қурол-яроғ етказиб беришни тўхтатишни талаб қилди

Хитой ТИВ расмий вакили Чжао Лисзян АҚШ ҳукумати Тайванга 100 миллион долларлик қурол-яроғ партиясини етказиб бериш фикридан қайтиши зарурлигини қайд этди. Бу ҳақда «ТАСС» хабар берган.

«Хитой Халқ Республикаси ушбу ҳолатга кескин эътироз билдиради ва мазкур ҳаракатни қоралайди. АҚШни «ягона Хитой» принципига риоя этишга, учта Хитой–АҚШ коммюникесидаги талабларга бўйсунишга, зудлик билан Тайванга қурол етказиб бериш бўйича юқорида қайд қилинган режани бекор қилишга чақирамиз», – деган дипломат.

Хитой Ташқи ишлар вазирлиги вакилининг сўзларига кўра, АҚШнинг бу каби ҳаракатлари Хитой суверенитетига, мамлакатнинг хавфсизлик соҳасидаги манфаатларига жиддий зарар етказади, шунингдек, «Хитой–АҚШ муносабатлари», Тайван бўғозидаги тинчлик ва барқарорликка ҳам путур етади.

«Хитой ўз суверенитетини мустаҳкамлаш ва хавфсизлик соҳасидаги манфаатларини таъминлаш учун керакли ҳамда самарали чора-тадбирларни амалга оширади», – дея қўшимча қилган мазкур чора-тадбирларни ҳамма кўришини таъкидлаб Чжао Лисзян.

Ўз навбатида АҚШ Мудофаа вазирлигининг хавфсизлик йўналишида ҳамкорлик қилиш агентлиги (DSCА) Давлат департаментининг Тайванга техник кўмак бериш, хизматлар ва Патриот зенит ракета комплексларини тақдим этишни тасдиқлаганини билдирган. Келишувнинг қиймати – 100 миллион доллар.

DSCА келишувга кўра, Патриот зенит ракета комплексларига хизмат кўрсатиш дастурини амалга оширмоқчи ва бу АҚШ ҳукуматининг талаби эканини қайд этган. Raytheon Technologies концерни ва Lockheed Martin корпорацияси пудратчилар сифатида рўйхатга олинган.

Аввал Пентагон АҚШнинг агар орол бу ҳақида илтимос қилса, у ҳолда Тайванни ташқи зўравонликдан ҳимоя қилишга тайёрлигини маълум қилганди.

Шунингдек, Тайван оролда АҚШ ҳарбийларининг борлигини тасдиқлаган. Бироқ орол маъмурияти оролда ўқув машғулотлари доирасида айнан қанча ҳарбий жойлаштирилганига аниқлик киритмаган.