Shavkat Mirziyoyev O‘zbekistonda kelgusi 5 yilda ichimlik suvi ta’minoti 90 foizga yetkazilishini ma’lum qildi

Prezident Shavkat Mirziyoyev huzurida hududlarda ichimlik suvi ta’minotini yaxshilash masalalari yuzasidan yig‘ilish boshlandi.

“So‘nggi besh yil davomida aholi suv ta’minotini yaxshilash bo‘yicha 10 trillion so‘m yoki oldingi yillarga nisbatan 5 baravar ko‘p mablag‘ ajratdik. Bu davrda ilk bor 6,5 million aholi toza ichimlik suvi bilan ta’minlandi”, – dedi davlat rahbari yig‘ilish avvalida.

2021-yilda 6300 kilometrga yaqin ichimlik va oqova suv tarmoqlari tortilgani, 474 ta suv inshootlari qurilgani, 592 ta mahallada 2,5 million aholining suv ta’minoti yaxshilangani ta’kidlandi.

“Eng muhimi, bu ishlar hisobiga 1,5 million aholi ilk bor ichimlik suvi bilan ta’minlandi. Shu bilan birga, hali sohada yechimini kutayotgan muammolar ko‘p”, – dedi davlat rahbari.

Misol uchun, 4 mingta mahallada ichimlik suvi sutkasiga 4–6 soat beriladi. 1,5 mingdan ortiq mahallada markazlashgan ta’minot yo‘lga qo‘yilmagan.

Bundan tashqari, 2 mingga yaqin bog‘cha, maktab va tibbiyot muassasalari markaziy tarmoqqa ulanmagani bois, suvni tashib kelishga majbur bo‘lmoqda.

Qashqadaryo, Surxondaryo va Jizzaxda ichimlik suvi ta’minoti 60 foizdan kam.

Prezident kelgusi besh yilda bu sohaga 40 trillion so‘m investitsiya jalb qilib, ichimlik suvi ta’minotini 90 foiz, oqova suv tizimi qamrovini 35 foizga yetkazish rejalashtirilganini ma’lum qildi.

2022-yilda ushbu maqsadlar uchun 2 trillion so‘m budjetdan ajratiladi, 245 million dollar jalb etiladi.

“Asosiy e’tiborni suv ta’minoti va sifati past hududlarni rivojlantirishga qaratamiz”, – dedi prezident.

Bu borada qo‘llanishi kerak bo‘lgan 3 ta tajriba ko‘rsatib o‘tildi:

• Namangan viloyatining 85 ta mahallasi uchun mahalliy byudjet hisobidan 260 kilometr tarmoq tortib, 8 ta quduq qazib, 8 ta suv minorasi qurilgan. Natijada 25 ming aholi markazlashgan ichimlik suvi bilan ta’minlangan.
• Baliqchi, Pop, Uchqo‘rg‘on, Qo‘shtepa va Quvaning 6 ta mahallasida vazirlikning ijtimoiy buyurtmasi asosida 7 ta suv inshooti va 117 kilometr tarmoq qurilib, 20 mingdan ortiq aholi ichimlik suvi bilan ta’minlanmoqda.
• yuqoridagi imkoniyatlar bo‘lmagan mahallalarda tashib kelinadigan suv hisobiga 25–50 tonnalik markaziy suv hovuzi qurib, xonadonlarga tarmoq o‘tkazsa bo‘ladi.