Adliya vaziri Ruslanbek Davletov 7-fevral kuni o‘tkazilgan an’anaviy yillik hisoboti davomida Toshkent shahrida haydovchilik guvohnomasi olish uchun imtihonlar o‘tkazish huquqi nega Yagona imtihon markaziga berilgani to‘g‘risida fikr bildirdi. Bu haqda “Daryo” muxbiri xabar qildi.
“Qachonlardir barham berilgan ‘Avtotest’ monopoliyasi boshqa ko‘rinishda qaytib keldi. Va uning qaytishida Vazirlar Mahkamasining qarori ham bor. Mana shunday, monopoliyaga yo‘l qo‘yuvchi qarorlarni Adliya vazirligi huquqiy ekspertizadan qanday o‘tkazib yubordi? Nega haydovchilik guvohnomasini olish faqat Yagona imtihon markaziga berildi?”, – deya jurnalist tomonidan berilgan savolga Ruslanbek Davletov quyidagicha javob berdi:
“Qarorda siz aytgandek monopoliya yo‘q. Vazirlar Mahkamasi qarorida shu sohada faoliyat yurituvchi tadbirkorlarga talablar bor. Men ‘Avtotest’ga kim egalik qilishi to‘g‘risida xabarga ega emasman. Men Vazirlar Mahkamasi qarorini bilaman. U yerda aytilganki, hozirda davlat o‘z funksiyalarini xususiy sektorga topshirmoqda. Qonunda inson omilisiz, elektron ravishda haydovchiga baho beradigan talablar belgilangan. Agar qaysidir hududda shu talablarga mos ravishdagi tadbirkor kirib kelsa, davlat o‘z funksiyasini tugatadi.
Mana, Toshkent shahrida imtihon oladigan maktab ochilibdi. Bu orqali davlat funksiyasi Toshkent shahrida tugatdi. Lekin viloyatlarda oldingi tartib saqlanib turibdi. Hamma viloyatda ochilsa, davlat tizimi tugaydi”.
Eslatib o‘tamiz, 3-fevral kuni Toshkentda haydovchilik guvohnomasini olish uchun imtihon topshirish bo‘yicha Toshkent imtihon markazi ish boshladi.
Ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev faqat yetarli bilim va malakaga ega haydovchilarga guvohnoma berilishni boshlagach, yo‘llarda haydovchilik madaniyati oshadi, yo‘l-transport hodisalari kamayishini aytib o‘tdi.
“Gazeta.uz” yozishicha, Yagona imtihon markazi (Toshkent Imtihon Markazi, TIM) tadbirkorlik subyekti huquqi asosida O‘zbekistonda birinchi bo‘lib haydovchilik guvohnomasini olish uchun nazariy va amaliy imtihonlar o‘tkazish bo‘yicha davlat xizmatini ko‘rsatish huquqini qo‘lga kiritgan birinchi kompaniya bo‘ldi. Uning saytida kompaniya rahbari sifatida Deniyel Byork ko‘rsatilgan.
3 fevral kuni saytning “Biz haqimizda” bo‘limida AVHT 1895 sonli litsenziya 2022-yil 2-fevralida qo‘lga kiritgani haqida ma’lumot berilgan edi. Biroq hozirda ushbu ma’lumot m.avjud emas.
KTYARD ochiq ma’lumotlariga ko‘ra, Autodriver Study avtmaktabi 2017-yil 6-oktabrda ro‘yxatga olingan. Rahbar sifatida Deniyel Byork (Burke Daniyel James) ko‘rsatilgan, yagona ta’sischi — Dilshod Shuhratovich Jo‘rayev.
Dilshod Jo‘rayev bir vaqtning o‘zida 2017-yil oktabr va noyabrida ro‘yxatga olingan Nurafshon Yo‘l Avtomaktabi va Innodriver Study avtomaktablarining ham egasi hisoblanadi. Innodriver Study yuridik manzili Avtotest, Avtotest 2.0 va Avtotest Obey Rules savdo belgilariga egalik qiladigan Avtotest Report kompaniyasi manzili bilan mos tushadi — Toshkentning Mirobod tumani Taras Shevchenko ko‘chasi 21-uy.
E’tiborlisi, mazkur binoning orqa qismida, Taras Shevchenko ko‘chasi 23-uyda Milliy TV telekanali ofisi joylashgan.
Avtotest maktablari asoschisi (hozirda u yerda ta’sischi sifatida Irodaxon Ismailova ko‘rsatilgan) va Milliy TV telekanalining amaldagi ta’sischisi (66,7 foizi) — Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi Komil Allamjonov.
Izoh (0)