Қашқадарё вилояти Чироқчи туманида 7 февраль куни «КамАЗ» юк машинасида ёнғин юзага келди. Бу ҳақда Йўл ҳаракати хавфсизлиги хизмати хабар қилди.
Қайд этилишича, ҳолат шу куни соат 13:30 атрофида туманнинг «Шўрқудуқ» маҳалласи Торжилға қишлоғидан ўтган Самарқанд—Ғузор автомобиль йўлида жойлашган газ тўлдириш шохобчасида содир бўлган. Ҳайдовчи газ тўлдириш вақтида хавфсизлик қоидаларига риоя қилмай, улагич узилмасидан аввал «КамАЗ-53212» юк автомобилини ҳаракатга келтирган. Оқибатда автомобилда ёнғин юзага келган.
Фавқулодда вазиятлар вазирлиги берган маълумотга кўра, ҳолатни бартараф этишга 2 та ёнғин-қутқарув экипажи жалб этилган. Қутқарувчилар воқеа жойига 7 дақиқада етиб бориб, ёнғин 11 дақиқада ўчирилган.
Ёнғинда юк машинасининг салон ва борт қисми ёниб зарарланган. Ҳодиса оқибатида тан жароҳати олган фуқаролар йўқ.
Ҳозирда туман ФВБ ва ЙҲХБ ходимлари томонидан суриштирув ишлари олиб борилмоқда. Ёнғин сабаби ва моддий зарар миқдори аниқланмоқда.
Изоҳ (0)