Somali janubida mikroavtobus minaga uchrab, 10 kishi, jumladan besh ayol va to‘rt bola halok bo‘ldi. Bu haqda Sinxua agentligi xabar berdi.
Mamlakat janubidagi Jubaland shtati armiyasining qo‘mondoni Dekou Abdinur Adenning aytishicha, portlash sodir bo‘lgan paytda yo‘lovchi avtobusi Kismayo port shahriga qarab ketayotgan edi.
“Jangarilar tomonidan sodir etilgan mina portlashi natijasida yana uch kishi jarohat oldi. Yaradorlar Kismayo shahridagi shifoxonaga yetkazildi”, — dedi Aden.
Uning so‘zlariga ko‘ra, portlash vaqtida Jubaland shtati kuchlari “Al-Shabob” jangarilariga qarshi jang qilayotgandi. Kismayo shimolidagi amaliyot chog‘ida bir necha jangari halok bo‘lgan, ikki askar yaralangan.
Avvalroq Somali poytaxti Mogadisho shahrida sodir bo‘lgan portlashda besh kishi halok bo‘lgan, yana 23 kishi jarohatlangan edi. Terrorchilar BMT avtokarvonini nishonga olgan.
Izoh (0)