Президент Александр Лукашенко телебошловчи Владимир Соловёвга берган интервьюсида Украина «Донбассга қарши уруш бошласа», Беларусь армияси худди Россия армияси каби ҳаракат қилишини маълум қилди. Мазкур суҳбат парчаси Соловёвнинг Telegram каналида эълон қилинган.
«Агарда улар (Украина — таҳр.) бизга ёки Россияга қарши уруш бошласа, у ҳолда биз ҳам ўзимини ҳимоя қилиш мақсадида жангга кирамиз», — дейди Лукашенко. Донбассга қарши ҳарбий ҳаракатлар содир бўлса, Беларусь армияси қандай йўл тутиши тўғрисидаги саволга Беларусь президенти «Россия армиясидек», — дея жавоб қайтарган.
Лукашенко, шунингдек, бу қўшма ҳаракатлар бўлишини тасдиқлаган. «Биз жанубий чегараларимизда ҳазил қиляпмизми?», — дейди у. Соловёвнинг Россия ва Беларусь айни вақтда кимга қарши ўқув машғулотларини ўтказяпти деган саволига Лукашенко «керак бўлса Украина ва НАТОга қарши», — дея аниқлик киритган.
Аввалроқ Россия—Беларусь ҳарбийлари ўртасидаги қўшма ўқув машғулотлар 2022 йилнинг февралида ўтказилиши тўғрисида хабар берилганди. Беларусь президенти Александр Лукашенко 17 январь куни Минскда ўтказилган йиғилишда қўшма ўқув машғулотлари февралда бошланишини маълум қилган. Шунингдек, унинг сўзларига кўра, Болтиқбўйи давлатлари ва Польшанинг ўн минглаб ҳарбий хизматчилари эътибори Беларусь чегарасига қаратилган. Январь ўрталаридан бошлаб Россия Қуролли Кучларининг «Иттифоқчилик жасорати» қўшма ўқув машғулотларида иштирок этадиган бўлинмалари Беларусга келишни бошлаган.
Conflict Intelligence Team тергов гуруҳи россиялик десантчилар Украина чегараси яқинига ташланаётганини маълум қилганди. Тергов гуруҳининг Россия темир йўллари маълумотлар базасига таяниб маълум қилишича, поезд Иванов вилоятидаги «Текстилний» станциясидан ҳаракатланган. Таъкидланишича, унинг ёнида 98-ҳаво-десант дивизиясининг 217-гвардия парашют-десант полка жойлашган.
Изоҳ (0)