Қашқадарё вилояти Қарши шаҳар «Шодлик» маҳалласида жойлашган кўп қаватли турар жойларнинг бирида 29 январь куни мудҳиш воқеа содир бўлди, деб хабар бермоқда Nasafnews.
Қайд этилишича, О.С. исмли йигит (1999 йилда туғилган) уйнинг 4-қаватидан пастга йиқилиб, воқеа жойида вафот этган.
«Марҳумни таниганлар ва унинг яқинлари воқеа уюштирилганини айтмоқда. Аммо йигит ўз жонига қасд қилгани ҳақида ҳам тахминлар йўқ эмас», — дейилади хабарда.
Нашр берган маълумотга кўра, марҳум йигит бу ерда расман никоҳ қурмаган аёл билан бирга ижарада яшаб келган.
«Яқин қўшниларининг айтишича, воқеадан аввал дўстим яшаган уйда жанжал содир бўлган. Ҳар хил овозлар эшитилган. Лекин дўстимни ўз жонига қасд қилганига ишонмайман», — дейди марҳумнинг яқин дўсти Ш.Қ.
Айтилишича, айни пайтда марҳум йиқилган жойга тош тўкиб қўйилган. У билан бирга яшаган аёл эса бу уйда яшамаяпти.
Марҳумнинг онаси Д.Т. воқеага ўғли билан яшаб келган аёл ҳам сабабчи эканини билдирган.
«У ўғлимни бошини айлантириб олганди. Ҳаттоки яқинда туғилган боласининг ҳам отаси ўғлим эканини айтди. Аммо бу ёлғон. Аёл бир вақтнинг ўзида нафақат ўғлим билан, балки бошқа эркаклар билан ҳам учрашиб юрган», — дейди у.
«Шодлик» маҳалласи раиси Асадулла Имомовнинг айтишича, марҳум йигит билан ижарада яшаб келган аёл воқеа содир бўлган вақтда маст ҳолатда бўлган. Раиснинг қўшимча қилишича, айни пайтда ҳолатни Қарши шаҳар прокуратураси ўрганмоқда.
Мавзуга доир:
- Россияда баландликдан йиқилиб, оғир тан жароҳати олган мигрант Ўзбекистонга қайтарилди
- Ғузорда 42 ёшли эркак кўчадан ўлик ҳолда топилди. Марҳумнинг яқинлари унинг ўлдирилганини айтмоқда
- «Танишлари билан хайрлашган». Қаршидаги ётоқхона биносидан ўзини ташлаб, вафот этган қизнинг сўнгги лаҳзалари кузатув камерасига тушиб қолди (видео)
Изоҳ (0)