O‘zbekiston Respublikasi Moliya vazirligi tomonidan joriy yilning 28-yanvarida O‘zbekiston Respublikasi Prezidentining 2020-yil 24-fevralda PQ 4611-son “Moliyaviy hisobotning xalqaro standartlari(MHXS)ga o‘tish bo‘yicha qo‘shimcha chora-tadbirlar to‘g‘risida” qarorining amalga oshirilishi natijalariga bag‘ishlangan davra suhbati tashkil etildi.
Mazkur davra suhbati respublikamizda moliyaviy hisobotning xalqaro standartlarini joriy etish, shuningdek, MHXS asosida tuzilgan moliyaviy hisobotni taqdim etish masalalari va muammolariga bag‘ishlanib, ushbu anjumanda milliy iqtisodiyotning real sektoridagi yirik kompaniyalar (“O‘zbekneftgaz” AJ, “Navoiy TMK”, “Olmaliq TMK”, “O‘zmetkombinat”, “O‘zavtosanoat”, “O‘ztelekom” va shu kabilar)ning bosh buxgalterlari va MHXS bo‘yicha mutaxassislari, “katta to‘rtlik”ga kiruvchi xalqaro auditorlik kompaniyalar mutaxassislari, MHXSni joriy etish bilan shug‘ullanuvchi konsalting kompaniyalar, respublikamizdagi auditorlik tashkilotlari hamda buxgalterlar va auditorlar jamoat birlamashmalari (federatsiyalari) rahbarlari ishtirok etishdi.
MHXSni joriy etish muammolariga bag‘ishlangan mazkur davra suhbati gibrid shaklda, ya’ni O‘zbekiston Respublikasi Moliya vazirligining binosida bevosita ishtirok etish (oflayn) hamda joylardan videoselektor ko‘rinishida (onlayn) tashkil etildi.
Davra suhbatini Moliya vazirining o‘rinbosari Dilshod Sultanov ochib berib, ishtirokchilar diqqatiga anjumanning maqsadi va ko‘zlanayotgan natijalar haqida ma’ruza qilib, MHXSni joriy etishda respublika korxona va tashkilotlari oldida turgan qiyinchiliklar to‘g‘risida fikr almashishni taklif etdi.
Davra suhbatida bevosita ishtirok etgan “O‘zbekneftgaz” AJning MHXS joriy etish bo‘limi boshlig‘i Hamza Tuxsanov so‘z olib, “O‘zbekneftgaz” AJda MHXSni joriy etish bo‘yicha erishilgan yutuqlar, yirik kompaniyalar ichidan birinchilar qatorida 2016—2020-yillar uchun MHXS asosida konsolidatsiyalashgan moliyaviy hisobotning tuzilishi va ularni Ernst & Young xalqaro auditorlik tashkilotidan tomonidan audit qilinib, ijobiy xulosalar olinganligi va rasmiy veb-saytda e’lon qilinganligi, 2021-yildan boshlab MHXS asosida yarim yillik uchun hisobotlar tuzilishi hamda mazkur hisobotlar asosida 2021-yilning 11-noyabrida London xalqaro fond birjasida “O‘zbekneftgaz” AJning yevroobligatsiyalarni joylashtirishga erishganligi to‘g‘risida batafsil ma’lumot berdi.
Shuning bilan birga, O‘zbekiston Respublikasi Prezidentining 2020-yil 24-fevralda PQ 4611-son “Moliyaviy hisobotning xalqaro standartlariga o‘tish bo‘yicha qo‘shimcha chora-tadbirlar to‘g‘risida” qarorining samarali amalga oshirilishi yo‘nalishidagi mavjud muammolar va ularning yechimi bo‘yicha o‘z takliflarini taqdim etdi, jumladan:
1. moliyaviy hisobot bo‘yicha qonunchilikda MHXS asosidagi konsolidatsiyalashgan va alohida moliyaviy hisobotning tushunchalarini kiritish hamda ushbu hisobotlarni taqdim etish tartiblarini yaratish;
2. konsolidatsiyalashgan moliyaviy hisobotni tuzadigan kompaniyalarning sho‘ba korxonalari uchun MHXS asosida alohida moliyaviy hisobotning tuzilishi va taqdim etish to‘g‘risidagi tartibini ishlab chiqish;
3. “O‘zbekneftgaz” AJ tomonidan MHXS asosida tuzilgan Schetlar rejasi asosida boshqa korxonalar uchun tavsiyaviy namuna ishlab chiqish;
4. respublikadagi auditorlar va buxgalterlar jamoat birlashmalari (O‘zbekiston buxgalterlar va auditorlar assotsiatsiyasi, O‘zbekiston auditorlar palatasi, O‘zbekiston buxgalterlari federatsiyasi) tomonidan respublikamizdagi auditorlik tashkilotlarining MHXS asosidagi hisobotlarni audit qilish bo‘yicha ishlarini tashqi sifat nazoratini o‘tkazishda “katta to‘rtlik”ga kiruvchi xalqaro auditorlik kompaniyalarining audit qilish metodologiyasiga mos kelishi bo‘yicha me’yoriy hujjat ishlab chiqish va uni joriy etish;
5. MHXS asosida tuzilgan moliyaviy hisobotni soliq organlariga taqdim etishning tartibini takomillashtirish va boshqalar.
Davra suhbatida amaliyot mutaxassislari tomonidan berilgan takliflar Moliya vazirligi tomonidan qayd etilib, yaqin kunlarda MHXS asosida tuziladigan moliyaviy hisobotni taqdish etish masalarini oydinlashtiruvchi ma’lumotnoma e’loni tayyorlanishi va ommaga taqdim etilishi to‘g‘risida qaror qilindi.
“O‘zbekneftgaz” AJ matbuot xizmati
Izoh (0)