2 февраль куни Нукус шаҳрида кўп сонли одамлар автомобиль йўлини тўсиб қўйгани тўғрисида хабар берилганди. «Gazeta.uz»нинг маълум қилишича, йўлни тўсган 3 нафар фуқарога 15 сутка маъмурий қамоқ жазоси тайинланган.
Нашр маълумотларига кўра, йўлни тўсганлар «Нукуа дилиша» МЧЖга қарашли 3 қаватли савдо биносида ижара асосида фаолият юритувчи тадбиркорлар. Дўконларнинг ижара пули сўнгги 3−4 ой ичида кўтарилган. Яқинда эса ижарачиларга ижара пули яна 1 миллион сўмга кўтарилиши маълум қилинган. Хусусан, иккинчи қаватда 2−3 миллион сўмга ижарада турувчи тадбиркорлар келаси ойдан бошлаб ижара учун 3−4 миллион сўмдан тўлашлари керак бўлган. Натижада ижарачи тадбиркорлардан тахминан, 50 нафари норозилигини билдириш учун бозор ёнидаги йўлни тўсган.
Қорақалпоғистон Республикаси Ички ишлар вазирлиги ушбу вазиятни жамоат тартибини бузиш деб атаган. 4 февраль куни вазирлик маҳаллий телеканалда содир бўлган вазият бўйича қўшимча маълумот берган. Унда ҳолат юзасидан қўзғатилган маъмурий иш Жиноят ишлари бўйича Нукус шаҳар суди томонидан кўриб чиқилгани айтилган.
Суд қарорига кўра, Нукус шаҳрида яшовчи Т.Ш, М.Т ва Ж.С.га нисбатан Маъмурий жавобгарлик тўғрисидаги кодекснинг 201-моддасига (йиғилишлар, митинглар, кўча юришлари ёки намойишлар уюштириш, ўтказиш тартибини бузиш) мувофиқ, йиғилишлар, митинглар, кўча юришлари ёки намойишлар уюштириш, ўтказиш тартибини бузганлиги учун ҳар бирига 15 сутка маъмурий қамоқ жазоси тайинланган.
Қорақалпоғистон ИИВ матбуот хизмати раҳбари Дауран Елмуратов «бу каби ҳаракатларни амалга ошириш давлатимизда қонун билан тақиқлангани» ҳақида фуқароларни огоҳлантирган.
Бундан аввал Қўйлиқда бозор бузилишидан норози одамлар катта автойўлни тўсган эди. Кейинчалик воқеа иштирокчилари қамоққа олинганди.
Изоҳ (0)