Ижтимоий тармоқларда Тошкент ахборот технологиялари университетида кредит-модуль тизимининг хатоси сабаб якуний имтиҳонлардан кўплаб талабалар йиқилаётгани тўғрисида хабарлар тарқалди. Университет матбуот хизмати мазкур ҳолатга муносбат билдириб, талабалар олий таълим муассасаси ҳисобига 300 миллион сўмдан ортиқ пул тўлаши мумкинлиги юзасидан тарқалган хабарларни рад этди.
Маълум қилинишича, Муҳаммад ал-Хоразмий номидаги Тошкент ахборот технологиялари университети ва унинг ҳудудий филиалларида 2018/2019-ўқув йилидан бошлаб ўқитишнинг кредит-модуль тизими жорий этилган. Ҳозирги кунда барча босқич талабалари таълимнинг кредит тизимида таҳсил олиб келмоқда. Университетда ўқув жараёни ва назоратларни ташкил этиш учун «lms.tuit.uz» тизими жорий этилган бўлиб, бунда инсон омили иштирок этмайди.
«Ушбу тизим 4 йил давомида университетимизда тўлақонли синовдан ўтган ва бундай ҳолатлар кузатилмаган. Ўтган давр мобайнида 10 минглаб талаба мазкур даргоҳни тамомлаб, жамиятимизда ўз ўрнига эга кадрлар сифатида фаолият юритиб келишмоқда», — дейилади муносабатда.
Таъкидланишича, универститетда якуний назоратлар ҳозирда ҳам давом этмоқда. Назорат ишлари натижасидан қониқмаган тақдирда талабалар аппеляцияга бериши мумкин. Қайта ўқиш учун тўлов қийматларига назорат ишлари ва аппеляция натижалари тугаллангандан сўнг аниқлик киритилади. Бунда фанлардан қайта ўқиш учун тўлов миқдори талабанинг бир йиллик тўлов шартнома миқдорининг 1 кредитга (1 кредит тўлов миқдори контракт миқдорини 60 га бўлинган нисбати) нисбатидан ва фанга ажратилган кредит миқдоридан келиб чиқиб белгиланади.
Бундан ташқари, хабарда билдирилган «университет масъулларининг хатоси талабаларнинг бўлиб ўтган якунийлардан йиқилишига сабаб бўлгани» ҳақидаги хабарларга ҳам муносабат билдирилган.
Университетда тасдиқланган ўқув жадвалига кўра, 2022 йил 2 февраль куни соат 11:00 да 2-босқич талабаларига «Дискрет тузилмалар» фанидан онлайн режимда 1400 нафарга яқин талабага якуний назорат иши ўтказилган. Иштирок этганлардан 50 фоиз талаба баҳолаш меъзонларида белгиланган ўтиш балларини тўплаб муваффақиятли ўтган (ушбу рўйхатдаги 300 га яқин талабалар аъло ва яхши баҳолар билан, қолган 300 дан ортиғи ҳам керакли баллар тўплаган). Қолган талабалар орасидан 72 нафарида эса «lms.tuit.uz» тизимида кузатилган қисқа техник носозлик сабабли саволлар вариантларини генерациялаш жараёнида бузилиш юз берган. Мавжуд техник носозликни бартараф этиш юзасидан зудлик билан университетнинг Telegram тармоғидаги расмий каналлари (ТАТУ|Расмий канали ва Cредит System оф ТУИТ) орқали маълум қилинган.
Университет маъмурияти мазкур ҳолат бўйича мурожаат қилган талабалар учун қайта якуний назорат олинишини маълум қилади.Таъкидланишича, якуний назоратларда тушган саволларга эътироз билдирган талабаларга «lms.tuit.uz» тизимида апелляция тартибида қайта кўриш учун ариза бериш имконияти яратилган. Апелляция жараёнлари 2-босқич талабалари учун барча имтиҳонлар якунлангандан сўнг ўтказилади.
Аввалроқ Олий ва ўрта махсус таълим вазирлиги ушбу масалани ўрганиш бўйича масъуллардан иборат тезкор ишчи гуруҳ тузилганини маълум қилганди. Вазирлик матбуот котиби Мўмин Ибодов ишчи гуруҳ олиб бораётган ўрганиш якунлари ҳам эълон қилинишини билдирган.
Изоҳ (0)