“Eski korrupsion tizimni xohlab ko‘r-ko‘rona qilinadigan tanqidlarga xolislik bilan munosabat bildirsangiz xursand bo‘lar edik” — IIV o‘rinbosari

Avval xabar berilganidek, 3-fevral kuni haydovchilik guvohnomasini olish uchun imtihon topshirish bo‘yicha Toshkent imtihon markazi ishga tushdi. Taqdimot marosimida ishtirok etib, so‘zga chiqqan ichki ishlar vaziri o‘rinbosari, jamoat xavfsizligi departamenti boshlig‘i Bekmurod Abdullayev imtihon qat’iy nazorat ostida inson omilidan xoli qilib olish boshlagandan keyin undan yiqiluvchilar soni ko‘p bo‘lishiga e’tibor qaratdi.

“Nimaga? Chunki hozir avtomaktablarda o‘qitish sifati juda past, bundan tashqari, ming afsuslar bo‘lsinki, o‘qimasdan haydovchilik guvohnomasini olish xalqimizning ongiga shu darajada singib ketganki, birdaniga insonlar dunyoqarashini o‘zgartirish qiyin. Ko‘pchilik o‘qishning o‘rniga tanish qidirishga tushib ketishi ham hech gap emas”, — deydi Abdullayev.

Shuningdek, ichki ishlar vaziri o‘rinbosari bu kabi imtihon markazlari ish boshlagach, ijtimoiy tarmoqlarda imtihondan yiqilgan aholining noroziligi, e’tirozlari, yangi tizimning kerak emasligi haqida gap-so‘zlar ko‘payishi va mas’ullar bunga ruhan tayyor ekanligini ma’lum qildi. “Agar prezidentimiz bu borada siyosiy iroda ko‘rsatmaganlarida edi, bunaqa revolyutsion qadam qo‘ya olmagan bo‘lardik. Bunaqa keskin islohotlar esa doim ham barchaga yoqavermasligi mumkin, ayniqsa avvalgi tizimdan manfaatdor insonlarga”, — deya ta’kidladi u.

Yangi imtihon markazlari bo‘yicha har qanaqa asosli e’tiroz va tanqidlar bo‘lsa, biz buni to‘g‘ri qabul qilamiz hamda xalqimizga, jurnalist va blogerlarga doim ochiqmiz. Ammo sizlardan iltimos, asossiz, shunchaki eski korrupsion tizimni xohlab ko‘r-ko‘rona qilinadigan tanqidlarga og‘ir-bosiqlik va xolislik bilan munosabat bildirsangiz xursand bo‘lar edik. Bir narsani unutmaylik, bu islohotlarning barchasi faqat va faqat xalqimiz, inson qadri, fuqarolarimiz hayoti va salomatligi uchun.

IIV o‘rinbosari, jamoat xavfsizligi departamenti boshlig‘i Bekmurod Abdullayev

Hukumat qaroriga 17-noyabr kuni kiritilgan o‘zgartirishlarga ko‘ra, O‘zbekistonda eski haydovchilik guvohnomasini almashtirish muddati 1 yilga uzaytirildi.

Davlat xizmatlari agentligi haydovchilik guvohnomasini yangisiga almashtirish xizmatini IIV YHXBB elektron tizimida texnik-profilaktik tadbirlar amalga oshirilishi munosabati bilan 12-noyabrdan boshlab vaqtincha to‘xtatgan.