Xitoyda 2021-yilda avtomobil eksporti undan oldingi yilga nisbatan ikki barobarga oshib, tarixda ilk bor 2,02 million donaga yetdi. Bu haqda Xitoy avtomobil sanoati assotsiatsiyasi tomonidan e’lon qilingan hisobotga tayanib, “TASS” xabar berdi.
Xususan, xorijga yangi energiya manbalari bilan ta’minlangan avtomashinalarni yetkazib berish uch barobar ortib, 310 ming avtomobilni tashkil etgan. Yengil avtomobillarining eksporti 1,61 million donaga, tijoriy avtomobillari eksporti esa 402 mingtaga yetgan.
Avtomobil ishlab chiqaruvchilar dekabr oyining o‘zida 223 ming dona avtomobil eksport qilgan (o‘sish 54 foiz).
Xitoydagi China International Capital Corporation (CICC) yetakchi investitsiya bank guruhi mamlakatdagi avtomobillar savdosi 2022-yilda 6,2 foizga o‘sishini taxmin qilmoqda. “Xitoy avtomobil sanoati mahsulotlariga iste’mol talabi 2022-yilda ham barqaror o‘sishni saqlab qolishi kutilmoqda”, — deyiladi korporatsiya hisobotida.
Pronozlarga ko‘ra, 2022-yilda mamlakatdagi avtomobil savdosi 27,22 million donaga yetadi. Shu bilan birga, yengil avtomobillar savdosi 22,76 millionga yetishi kutilyapti — o‘sish 8,1 foiz. Yuk mashinalari va boshqa tijoriy avtomobillar 2,2 foizga ko‘proq ishlab chiqariladi — 4,46 million dona.
CICC prognozlarida qayd etilishicha, tobora ommalashib borayotgan ikki g‘ildirakli elektromobillar savdosi 2022-yilda 54 million donaga yetishini kutmoqda — bu 2021-yilga nisbatan 14,9 foizga ko‘p demak.
Avvalroq Yaponiyaning eng yirik avtomobil ishlab chiqaruvchisi Toyota dunyo bo‘ylab barcha zavodlarini yopmoqchiligini e’lon qilgandi. Ishlab chiqarishning to‘xtatilishga yarimo‘tkazgichlar yetishmasligi sabab bo‘lmoqda.
Izoh (0)