Erkinjon Turdimov “negativ” topgan jamoatchilikka pul berilishini aytdi

Samarqand viloyati hokimi Erkinjon Turdimov 2-fevral kuni viloyatdagi kushxonalar va qassoblar faoliyatini tartibga solish bo‘yicha o‘tkazilgan yig‘ilishda tanqid qilgan jurnalist, bloger va jamoatchilik faollari rag‘batlantirilishini ma’lum qildi, deb xabar beradi Zarnews.

Viloyat hokimining so‘zlariga ko‘ra, 15-fevraldan boshlab blogerlar, jurnalistlar, jamoatchilik — kim “negativka” olib kelsa, mukofotlanadi. Turdimov ularga alohida pul topib berishni va’da qilgan. Bunda salbiy kamchiliklarni kim olib kelishining farqi yo‘qligi, rasmga tushirilib, tasdiqlanishi va tekshirilishini qayd etgan.

“Kattaroq material bo‘lsa — ko‘proq, kichikroq material bo‘lsa — kamroq pul beramiz. Chunki xalqning salomatligi bu. Jurnalistlar kamchiliklar haqida yaxshi ko‘rsatuv qilib kelsa, masalan, tibbiy ko‘rikdan o‘tmagan odam go‘sht sotayotgan bo‘lsa, SESning o‘sha vakili ishdan ketadi. Javobgarlikka torttiraman, hech baloni qo‘ymayman. Qassobning o‘zini sharmandasini chiqaraman. Sudga berib, bir yilga qassobchilik qilish huquqidan mahrum qilaman. Qani bittasi o‘sha joyga shtampni ursin (ruxsat bersin — tahr.) butun dunyoga sharmanda qildiraman”, — deydi u.

Erkinjon Turdimovning qayd etishicha, shu kabi jamoat ishlarida faol ishtirok etganlar budjetdan rag‘batlantiriladi. “Buni qanday qilamiz? Masalan, mahalla raisi, ‘uchastkovoy’ budjetdan oylik oladi, to‘g‘rimi? Hokim yordamchisi, veterinary, vet-laboratoriya ham budjetdan oylik oladimi? Jarima! Oyligidan 30-40 foiz jarima qilish mumkinmi? Hammasining jarimasi budjetga tushadi va ‘ekonom’ bo‘lib qoladi. O‘sha summadan ularga mukofot puli yozib beramiz”, — deya ta’kidlagan viloyat hokimi.

Avvalroq Samarqand viloyati hokimi Erkinjon Turdimov kelgusi 5 yilda Samarqandda loy ko‘chalar qolmasligini aytgan edi.