O‘zbekiston prezidentining 2-fevraldagi 110-sonli qaroriga ko‘ra, Shahrillo Mahmudov va Abdullo Aslonov turizm va sport vazirining o‘rinbosarlari lavozimiga tayinlandi, deb xabar beradi vazirlik matbuot xizmati.
Ma’lumot uchun, Abdullo Aslonov 1984-yil 8-iyul kuni Samarqand viloyatida tug‘ilgan. 2014-yilda Samarqand davlat chet tillar instituti magistraturasini tamomlagan. Shuningdek, u Regent London (Angliya), Kings Institute (Angliya), Marlborough College of Businnes and Technology (Angliya) talabasi bo‘lgan.
Ko‘p yillar davomida Aslonov “Kamolot” yoshlar ijtimoiy harakati tizimida faoliyat yuritgan. 2020-yildan Oliy Majlis Qonunchilik palatasi Xalqaro ishlar va parlamentlararo aloqalar qo‘mitasining a’zosi hisoblanadi.
Shahrillo Mahmudov 1970-yil 13-sentabrda Buxoro viloyatida tug‘ilgan. U 1992-yilda Buxoro davlat pedagogika institutini “jismoniy tarbiya o‘qituvchisi” yo‘nalishida tamomlagan. 2013-yildan buyon O‘zbekiston og‘ir atletika federatsiyasi raisining birinchi o‘rinbosari lavozimida faoliyat yuritgan.
Mahmudov 2002-yilda “O‘zbekistonda xizmat ko‘rsatgan sport ustozi” faxriy unvoni, 2016-yilda “Mehnat shuhrati” ordeni hamda 2021-yilda “I darajali Sog‘lom avlod uchun” ordeni bilan mukofotlangan.
Ta’kidlanishicha, O‘tkir Saidov va Avazjon Karimov boshqa ishga o‘tishi munosabati bilan turizm va sport vazirining o‘rinbosari lavozimlaridan ozod etilgan.
Avvalroq Xalqaro islom akademiyasi rektori prezident maslahatchisi etib tayinlangani, Din ishlari bo‘yicha qo‘mita raisiga birinchi o‘rinbosar tayinlangani, Prezident administratsiyasining mas’ul xodimi Angren shahriga hokim bo‘lgani, Abdulla Azizov OKMK boshqaruv raisi o‘rinbosari etib tayinlangani to‘g‘risida xabar berilgandi.
Izoh (0)