Xalq ta’limi vaziri Baxtiyor Saidov boshchiligida Toshkent shahar xalq ta’limi bosh boshqarmasi rahbariyati va barcha tuman xalq ta’limi bo‘limi mudirlari ishtirokida sohada amalga oshirilishi lozim bo‘lgan islohotlar va uning natijadorligiga bag‘ishlangan yig‘ilish bo‘lib o‘tdi. Bu haqda XTV matbuot xizmati xabar berdi.
Yig‘ilishda Toshkent shahar xalq ta’limi tizimi mas’ul xodimlari, maktab direktorlari va pedagoglar oldida turgan dolzarb vazifalarga alohida to‘xtalib o‘tilgan. So‘ngra hozirgi kunda vakant bo‘lgan Toshkent shahar xalq ta’limi bosh boshqarmasi boshlig‘i vazifasini vaqtincha bajarish Yashin Sultonovga yuklatilgan.
Mazkur tayinlovga qadar Yashin Sultonov Xalq ta’limi vazirligi tasarrufidagi “O‘quv-ta’lim-ta’minot” DUK direktori vazifasida faoliyat yuritgan.
Yig‘ilish so‘ngida yangi rahbarga poytaxt maktablarida ta’lim sifatini yaxshilash, maktab ta’limini rivojlantirish hamda namunaviy darajaga olib chiqish borasida tegishli vazifalar yuklatilgan.
Eslatib o‘tamiz, 2020-yilning noyabrida Artel maktabi direktori Kozimjon Hasanov Toshkent shahar xalq ta’limi boshqarmasi boshlig‘i etib tayinlangandi. Uning qachon va nima sababdan ishdan olingani noma’lum. XTV saytidagi ma’lumotlarga ko‘ra, Toshkent shahar xalq ta’limi bosh boshqarmasi boshlig‘i vazifasini Dilfuza Islamova bajarib kelgan.
Ma’lumot uchun, 2021-yil 17-noyabr kuni O‘zbekiston xalq ta’limi vaziri o‘zgardi — Sherzod Shermatov AKT sohasi rahbarligiga o‘tkazilgani munosabati bilan uning o‘rniga O‘zbekistonning Xitoydagi elchisi Baxtiyor Saidov xalq ta’limi vaziri etib tayinlandi. Saidov mustaqil O‘zbekiston tarixidagi 9-xalq ta’limi vaziridir.
Izoh (0)