2021-yilning 20-dekabr kuni UzAuto Motors kompaniyasi 2022-yilning fevraligacha Nexia, Spark, Cobalt va Lacetti avtomobillarini sotish bo‘yicha yangi arizalar qabul qilishni to‘xtatgan edi. Aytilgan muddat, ya’ni 1-fevral kelgan bo‘lsa-da, UzAuto Motors shartnoma tuzish muddati tiklangani yoki uzaytirilgani haqida o‘z saytida rasmiy xabar bermadi.
Holat yuzasidan “Daryo” UzAuto Motors kompaniyasi axborot xizmati rahbari Aleksey Agureyevdan izoh olish maqsadida bog‘landi. Ammo u nashr so‘roviga javob bermadi.
“O‘zavtosanoat” kompaniyasi axborot xizmati rahbari Zumrad Shojalilova “Daryo” muxbiriga bergan izohida unda hech qanday ma’lumot yo‘qligi, agar yangilik bo‘lsa, rasmiy axborot berilishini aytish bilan cheklangan.
“Daryo” holatga yanada oydinlik kiritish maqsadida Toshkent shahridagi avtosalon xodimi bilan bog‘landi. Uning aytishicha, ko‘rsatilgan avtomobillar uchun shartnoma tuzish qayta tiklanmagan.
“Qachon qayta tiklanishi bo‘yicha bizga xabar kelgani yo‘q. Faqatgina Damas, Malibu, Labo, Trailblazer hamda Equinox uchungina shartnoma tuzish mumkin”, — dedi avtosalon xodimi.
2021-yilning 20-dekabr kuni UzAuto Motors “vaqtinchalik yangi avtomobilga buyurtma bera olmagan potensial xaridorlaridan chin dildan uzr so‘ragan” edi.
UzAuto Motors avgust oyida atigi 2 dona Gentra va birorta ham Spark ishlab chiqarmagandi. Kompaniya buni yarimo‘tkazgichlarning global tanqisligi va ishlab chiqarish bosqichma-bosqich transformatsiya qilingani bilan izohlab, shu doirada yagona platformadagi avtomobillarni ishlab chiqarishga o‘tish rejalashtirilganini ma’lum qilgan edi. Sentabr oxirlarida esa kompaniya Lacetti va Spark ishlab chiqarish tiklanganini e’lon qildi. Oktabr boshida esa UzAuto Motors Lacetti ishlab chiqarish hajmini oshirdi. Oktabr oxiriga borib kompaniya Lacetti va Labo yetkazib berishni 2 oyga kechiktirganini ma’lum qildi. Noyabr oxirida esa UzAuto Motors barcha turdagi avtomobillarini yetkazib berishni 2 oyga kechiktirdi.
2022-yilning 19-yanvar kuni UzAuto Motors Lacetti va Cobalt vaqtincha magnitolasiz yetkazib berilishini ma’lum qildi.
Izoh (0)