Халқ таълими вазири Бахтиёр Саидов бошчилигида Тошкент шаҳар халқ таълими бош бошқармаси раҳбарияти ва барча туман халқ таълими бўлими мудирлари иштирокида соҳада амалга оширилиши лозим бўлган ислоҳотлар ва унинг натижадорлигига бағишланган йиғилиш бўлиб ўтди. Бу ҳақда ХТВ матбуот хизмати хабар берди.
Йиғилишда Тошкент шаҳар халқ таълими тизими масъул ходимлари, мактаб директорлари ва педагоглар олдида турган долзарб вазифаларга алоҳида тўхталиб ўтилган. Сўнгра ҳозирги кунда вакант бўлган Тошкент шаҳар халқ таълими бош бошқармаси бошлиғи вазифасини вақтинча бажариш Яшин Султоновга юклатилган.
Мазкур тайинловга қадар Яшин Султонов Халқ таълими вазирлиги тасарруфидаги «Ўқув-таълим-таъминот» ДУК директори вазифасида фаолият юритган.
Йиғилиш сўнгида янги раҳбарга пойтахт мактабларида таълим сифатини яхшилаш, мактаб таълимини ривожлантириш ҳамда намунавий даражага олиб чиқиш борасида тегишли вазифалар юклатилган.
Эслатиб ўтамиз, 2020 йилнинг ноябрида Artel мактаби директори Козимжон Ҳасанов Тошкент шаҳар халқ таълими бошқармаси бошлиғи этиб тайинланганди. Унинг қачон ва нима сабабдан ишдан олингани номаълум. ХТВ сайтидаги маълумотларга кўра, Тошкент шаҳар халқ таълими бош бошқармаси бошлиғи вазифасини Дилфуза Исламова бажариб келган.
Маълумот учун, 2021 йил 17 ноябрь куни Ўзбекистон халқ таълими вазири ўзгарди — Шерзод Шерматов АКТ соҳаси раҳбарлигига ўтказилгани муносабати билан унинг ўрнига Ўзбекистоннинг Хитойдаги элчиси Бахтиёр Саидов халқ таълими вазири этиб тайинланди. Саидов мустақил Ўзбекистон тарихидаги 9-халқ таълими вазиридир.
Изоҳ (0)