O‘zbekiston bo‘ylab koronavirus infeksiyasiga qarshi emlangan fuqarolar o‘rtasida yutuqli o‘yinlar tashkil qilinishi va bosh sovringa avtomobil qo‘yilishi to‘g‘risida xabar berilgandi. Bloger va huquqshunos Xushnud Xudoyberdiyevning yozishicha, 29-yanvar kuni Zo‘r TV kanalida avtomobil sovrinining ilk g‘olib aniqlangan.
Ma’lum qilinishicha, 15-yanvardan boshlab mamlakatda “Vaksina — to‘g‘ri tanlov” yutuqli o‘yinlari tashkil etilmoqda va u 5 oy davomida o‘tkaziladi. Unga ko‘ra, har hafta 35 ta velosiped, 25 ta televizor, 25 ta smartfon va 25 ta planshet o‘ynaladi. Har oyning so‘nggi shanba kunida esa super-yutuq — Malibu avtomobili o‘ynaladi.
29-yanvar kuni Zo‘r TV telekanalida orqali o‘tkazilgan o‘yinda ilk g‘olib aniqlandi — Farg‘onaning Furqat tumanidan Bahodirjon Esonaliyev Xaliljon o‘g‘li Malibu egasiga aylangan.
Ma’lumot uchun, 2022-yil 15-yanvardan boshlab vaksina olgan barcha fuqarolar avtomatik ravishda yutuqli o‘yin ishtirokchisiga aylanishadi, qo‘shimcha ravishda biror joydan ro‘yxatdan o‘tish shart emas. Vaksina turining farqi yo‘q, istalganini olsa hisob. Qaysi dozaligining ham farqi yo‘q.
Avvalroq O‘zbekiston Sog‘liqni saqlash vazirligi ishbilarmon va tadbirkorlardan o‘z xodimlarini 2022-yil 20-yanvarga qadar koronavirusga qarshi emlashni hamda sababsiz emlanmaganlarni ishga qo‘ymaslik choralarini ko‘rishni so‘ragan edi. Ma’lum qilinishicha, bosh davlat sanitariya vrachining 2021-yil 17-iyuldagi 11-son qarorida 18 yoshdan katta aholi qatlamini koronavirus infeksiyasiga qarshi emlash belgilangan. Mehnat kodeksining 113-moddasiga ko‘ra, xodim emlanishni rad etsa, ish beruvchi uni ishga qo‘ymaslikka haqli.
Izoh (0)