AQSh sobiq prezidenti Donald Tramp davlat rahbari sifatidagi to‘rt yillik faoliyati haqida memuar kitob nashr etishni rejalashtirmoqda. Bu haqda u Newsmax telekanaliga bergan intervyusida gapirib o‘tdi.

Foto: EPA

“Ha, men ularni yozyapman. Mana ko‘rasiz — bu juda kuchli bitik” — dedi u.

Oq uy sobiq rahbarining so‘zlariga ko‘ra, uning bo‘lajak kitobi allaqachon “nashriyotlarda katta qiziqish uyg‘otgan”.

Tramp kitobda qaysi mavzularga to‘xtalib o‘tishini ochiqlamadi.

Avvalroq u birinchi kitobi “Rojdestvo xaridlari mavsumi”gacha nashr etilishini e’lon qilgandi. Keyin u bo‘lajak kitobini “barcha vatanparvarlar o‘qishi shart” deb ta’rifladi. Fotosuratlar bilan boyitilishi rejalashtirilgan kitobning dastlabki nomi — “Birgalikdagi sayohatimiz”.

Eslatib o‘tamiz, oktabr boshida Forbes AQShning eng badavlat insonlari ro‘yxatini e’lon qilgan va Tramp 25 yil ichida birinchi bor unga kiritilmagan edi. Uning reytingga kirishi uchun 400 million dollar yetmagan. Tahlilchilarning baholashicha, sobiq prezidentning boyligi 2,5 milliard dollarni tashkil etadi.