Isroil prezidenti Isxak Gersog va uning rafiqasi 30-yanvar kuni Birlashgan Arab Amirliklariga (BAA) birinchi rasmiy tashrif bilan uchib ketdi. Bu haqda prezident idorasiga tayanib, “TASS” xabar berdi.
“Tarixda birinchi marta prezident Gersog BAAning amaldagi hukmdori va Abu-Dabi valiahd shahzodasi Muhammad bin Zaid Al Nahayonning taklifiga binoan bugun (30-yanvar) ertalab prezidentlik tashrifi uchun BAAga ketdi. Prezident Abu-Dabi va Dubayga tashrif buyurib, Abu-Dabi valiahd shahzodasi, BAA tashqi ishlar va xalqaro hamkorlik vaziri Shayx Abdulla bin Zaid Al Nahayon hamda BAA vitse-prezidenti, bosh vaziri, Dubay amiri Muhammad bin Rashid Al Maktum bilan rasmiy uchrashuvlar o‘tkazadi”, — deyiladi bayonotda.
Gersog safar oldidan ta’kidlaganidek, uning 31-yanvargacha davom etadigan tashrifi 2020-yilning sentabr oyida Vashingtonda Isroil tomoni AQShning faol vositachiligida BAA va Bahrayn bilan munosabatlarni normallashtirish bo‘yicha imzolagan hujjatlari tufayli amalga oshmoqda. “Ibrohim kelishuvi” deb nomlanuvchi mazkur uch tomonlama kelishuvdan oldin Isroil faqat Misr va Iordaniya bilan diplomatik munosabatlarga ega edi.
Tashrif davomida Gersog BAAdagi EXPO xalqaro ko‘rgazmasida Isroil kunini ham ochib beradi.
“O‘zim bilan butun mintaqaga tinchlik xabarini olib kelaman. Tinchlik esa o‘z ortidan mintaqa xalqlari manfaati uchun farovonlik, taraqqiyot va o‘sishni yetaklab keladi”, — deya Gersogning bayonotidan iqtibos keltiradi prezident idorasi.
2021-yilning mart oyida tarixda birinchi marta BAA elchisi Isroilning Tel-Aviv shahriga tashrif buyurgandi. 14-iyul kuni esa BAA Tel-Aviv shahrida o‘z elchixonasini rasman ochdi. O‘sha yilning iyun oyi oxirida Abu-Dabida Isroil elchixonasi ochilgandi.
Izoh (0)