Kanada bosh vaziri Jastin Tryudo va uning oilasi xavfsizlik nuqtayi nazaridan poytaxt Ottavadagi qarorgohini tark etdi. Bu haqda CBC telekanali xabar berdi.
Bosh vazirning aynan qayerga ketgani oshkor etilmagan. Tryudoning qarorgohi Rido-xollda, shahar markazidan unchalik uzoq bo‘lmagan Kanada general-gubernatori rezidensiyasining yonida joylashgan. Hozircha hududda qonunbuzarlik holatlari qayd etilmagan.
Ottavada 23-yanvar kuni “Ozodlik ustuni” shiori ostida yuk tashuvchilarning hukumatga qarshi mitingi boshlandi. Bunga yanvar boshidan Tryudo Liberal hukumati tomonidan AQSh—Kanada chegarasini kesib o‘tuvchi yuk mashinalarining egalaridan vaksinatsiya sertifikati talab qilinayotgani sabab bo‘lgan. Tryudo Ottavadagi namoyishchilarni “ozchilik guruh” deb atadi. Uning so‘zlariga ko‘ra, ko‘chaga chiqqanlar kanadaliklarning pozitsiyasini ifodalamaydi.
30-yanvar kuni Kanada bo‘ylab minglab odamlar yuk mashinalari kolonnalarida Kanada poytaxtiga yetib kelgan. Rasmiylar Ottavaga kelayotgan yuk tashuvchilar soni dam olish kunlari 10 mingga yetishini prognoz qilmoqda.
Izoh (0)