Farg‘onada “Yangi O‘zbekiston” massivlari turkumiga kiruvchi, O‘zbekistondagi ilk ekoshaharning tamal toshi qo‘yildi, deb xabar bermoqda viloyat hokimligi matbuot xizmati.
Qayd etilishicha, mazkur ekoshahar Farg‘ona shahri, Farg‘ona va Yozyovon tumanida qurilishi nazarda tutilgan. Ayni vaqtda viloyat markazida 300 gektar maydonda 40 ming aholiga mo‘ljallangan yo‘ldosh shaharchani bunyod etish ishlari boshlandi. Hozirda ekoshahardagi “Yangi O‘zbekiston” bog‘ining qariyb 40 gektar maydoniga manzarali daraxtlar ekilgan.
Yangi massiv qurilishining boshlanishi marosimida viloyat hokimi Xayrullo Bozorov so‘zga chiqib, noyob loyiha doirasidagi bunyodkorlik ishlari aholi turmush darajasini yanada yaxshilashga xizmat qilishini alohida ta’kidladi.
“Bugun Farg‘ona viloyati hayotida tarixiy kun. Katta maqsadlar va yuksak marralarni ko‘zlagan holda ko‘p qavatli uylar qurilishiga kirishilmoqda. Birinchi bosqichda 80 ta ko‘p qavatli uylarni bunyod etishni rejalashtiryapmiz. Ikki yilda ekoshaharning qurilishini yakunlamoqchimiz. Bu yerdagi har bir ishning o‘z egasi bor.
Tasavvur qiling, ikki yilda mana shu 300 gektarlik dasht maydon o‘rnida ko‘p qavatli uy-joylar, ‘Yangi O‘zbekiston’ bog‘i, maktab, poliklinika, qo‘yingki, barcha infratuzilmaga ega shaharcha paydo bo‘ladi. Qolaversa, loyiha oddiy emas. Prezidentimizning topshirig‘i bilan Janubiy Koreya tajribasi asosida bu shaharchaning loyihasi ishlab chiqildi. 7, 9, 12, 25 qavatli uylarning narxini aholiga maqbul keladigan qilib belgilayapmiz. Shuningdek, bu yerda barcha infratuzilma yaratiladi”, — degan u.
Hokimlik xabariga ko‘ra, marosimda Qur’on tilovat qilinib, yaxshi niyatlar bilan duo-fotihalar qilindi. Shundan so‘ng qurilish ishlariga start berilib, dastlabki bino poydevoriga kelajakka bitilgan maktub solingan kapsula joylashtirildi.
Eslatib o‘tamiz, Farg‘onada 300 gektar maydonda ekoshahar barpo etilishi haqida 2021-yilning avgustida ma’lum qilingandi.
Izoh (0)