Фарғонада «Янги Ўзбекистон» массивлари туркумига кирувчи, Ўзбекистондаги илк экошаҳарнинг тамал тоши қўйилди, деб хабар бермоқда вилоят ҳокимлиги матбуот хизмати.
Қайд этилишича, мазкур экошаҳар Фарғона шаҳри, Фарғона ва Ёзёвон туманида қурилиши назарда тутилган. Айни вақтда вилоят марказида 300 гектар майдонда 40 минг аҳолига мўлжалланган йўлдош шаҳарчани бунёд этиш ишлари бошланди. Ҳозирда экошаҳардаги «Янги Ўзбекистон» боғининг қарийб 40 гектар майдонига манзарали дарахтлар экилган.
Янги массив қурилишининг бошланиши маросимида вилоят ҳокими Хайрулло Бозоров сўзга чиқиб, ноёб лойиҳа доирасидаги бунёдкорлик ишлари аҳоли турмуш даражасини янада яхшилашга хизмат қилишини алоҳида таъкидлади.
«Бугун Фарғона вилояти ҳаётида тарихий кун. Катта мақсадлар ва юксак марраларни кўзлаган ҳолда кўп қаватли уйлар қурилишига киришилмоқда. Биринчи босқичда 80 та кўп қаватли уйларни бунёд этишни режалаштиряпмиз. Икки йилда экошаҳарнинг қурилишини якунламоқчимиз. Бу ердаги ҳар бир ишнинг ўз эгаси бор.
Тасаввур қилинг, икки йилда мана шу 300 гектарлик дашт майдон ўрнида кўп қаватли уй-жойлар, ‘Янги Ўзбекистон’ боғи, мактаб, поликлиника, қўйингки, барча инфратузилмага эга шаҳарча пайдо бўлади. Қолаверса, лойиҳа оддий эмас. Президентимизнинг топшириғи билан Жанубий Корея тажрибаси асосида бу шаҳарчанинг лойиҳаси ишлаб чиқилди. 7, 9, 12, 25 қаватли уйларнинг нархини аҳолига мақбул келадиган қилиб белгилаяпмиз. Шунингдек, бу ерда барча инфратузилма яратилади», — деган у.
Ҳокимлик хабарига кўра, маросимда Қуръон тиловат қилиниб, яхши ниятлар билан дуо-фотиҳалар қилинди. Шундан сўнг қурилиш ишларига старт берилиб, дастлабки бино пойдеворига келажакка битилган мактуб солинган капсула жойлаштирилди.
Эслатиб ўтамиз, Фарғонада 300 гектар майдонда экошаҳар барпо этилиши ҳақида 2021 йилнинг августида маълум қилинганди.
Изоҳ (0)