O‘zbekistonda 2021-yilda davlat organlari va tashkilotlarida ishlovchi 3050 nafar xodim tomonidan 4186 holatda korrupsion jinoyat qayd etilgan. Bu haqda AOKAda bo‘lib o‘tgan brifingda Koorupsiyaga qarshi kurashish agentligi axborot xizmati rahbari Durdona Ochilova ma’lum qildi.
Qayd etilishicha, o‘tgan yilda korrupsiyaning oldini olishga qaratilgan 26 ta normativ-huquqiy hujjat loyihasi ishlab chiqilgan bo‘lib, hozirda ushbu hujjatlarning 8 tasi qabul qilingan.
Shuningdek, 2021-yilda Davlat xaridlari to‘g‘risidagi qonun hujjatlari ijrosi buzilgani oqibatida 142,7 milliard so‘m miqdoridagi moddiy zarar yetkazilgani bilan bog‘liq qonunbuzilish holatlari aniqlangan. Ushbu tadbirlar davomida aniqlangan korrupsiya holatlari yuzasidan to‘plangan hujjatlar huquqni muhofaza qiluvchi organlarga taqdim qilinib, Jinoyat kodeksining tegishli moddalari bilan umumiy 49 ta jinoyat ishi va 24 ta ma’muriy ishlar qo‘zg‘atilgan.
Bundan tashqari, budjet buyurtmachilari tomonidan obyektlarni qurish va joriy ta’mirlash bo‘yicha “Dxarid.uz” va “Tender.mc.uz” maxsus axborot portalida joylashtirilgan e’lonlar joylarga chiqqan holda o‘rganilganda, dastlabki aniqlangan jami 134 ta obyektda 85,5 milliard so‘mlik joriy ta’mirlash va qurilish ishlari tanlov g‘oliblari aniqlanmasdan boshlab yuborilgani yoki allaqachon tamomlangani ma’lum bo‘lgan.
Tahlillarga ko‘ra, 2021-yilning o‘tgan 12 oyi mobaynida 6 294 nafar shaxs tomonidan 7 953 ta korrupsion holat bilan bog‘liq jinoyatlar sodir etilgan. Shundan, davlat organlari va tashkilotlari zimmasiga yuklatilgan vazifa va funksiyalarni bajarishga oid 3050 nafar shaxs tomonidan 4186 ta korrupsion holat bilan bog‘liq jinoyatlar hisobga olingan.
Avvalroq Bosh prokuratura 2021-yil davomida mamlakatda jami 2 345 ta jinoyat ishi bo‘yicha 2 804 nafar mansabdor shaxslar jinoiy javobgarlikka tortilganini ma’lum qilgandi.
Izoh (0)