Qozog‘iston elektr tarmoqlarini boshqarish kompaniyasi 2022-yil 25-yanvar kuni O‘zbekiston, Qozog‘iston va Qirg‘izistonda kuzatilgan elektr ta’minotidagi yirik uzilishlarning sababini ma’lum qildi, deb yozmoqda Tengrinews.
“O‘zbekistonda 2022-yil 25-yanvar kuni Nur-Sulton vaqti bilan soat 11.59 da (Toshkent vaqti bilan 10.59) Sirdaryo IESda yuz bergan qisqa tutashuv tufayli 6 ta energoblok o‘chib, umumiy ishlab chiqarish quvvati 1500 MVt.dan ortiq yo‘qotilgan. O‘zbekiston energetika tizimida yuzaga kelgan elektr quvvati taqchilligi Qozog‘iston energetika tizimidan O‘zbekiston va Qirg‘iziston energetika tizimlari bilan parallel ishlashga ulangan elektr energiyasinining beixtiyor uzilishiga olib kelgan. Natijada, 500 kilovoltlik “Shimoliy-Sharqiy-Qozog‘iston janubi” tranziti uchun elektr quvvatining ko‘tarilishi, uning ortiqcha yuklanishi kuzatilgan”, — deyiladi kompaniya bayonotida.
Qayd etilishicha, O‘zbekiston va Qirg‘izistonning energetika tizimlari to‘liq ishdan chiqqan, barcha elektr stansiyalari va iste’molchilar ta’minoti to‘xtatilgan. O‘zbekiston energetika tizimida uzilgan yuklanish taxminan 9600 MVt (iste’molning 100 foizi), Qirg‘izistonda 2600 MVt (iste’molning 100 foizi)ni tashkil etgan.
Shuningdek, kompaniya bayonotida elektr ta’minotidagi uzilishlar kriptovalyuta maynerlarining faoliyati bilan bog‘liq emasligi qayd etilgan.
“KEGOC ma’lumotlariga ko‘ra, taqchillikning asosiy omillari elektr stansiyalarida avariyaga moyillikning yuqoriligi va elektr energiyasi iste’molining sezilarli o‘sishi bo‘lib, o‘tgan yil davomida ushbu ko‘rsatkich 6 foizdan oshdi, bu so‘nggi yillarga nisbatan 3 barobar ko‘pdir. Elektr energiyasi taqchilligi sharoitida KEGOC elektr stansiyalari va energiya ta’minoti tashkilotlari bilan birgalikda mayning ma’lumot markazlariga rejalashtirilgan elektr energiyasini yetkazib berishni qisqartirish choralarini ko‘rdi”, — deyiladi xabarda.
Qozog‘iston muammo haqida avvaldan bilgan
Tasdiqlangan ma’lumotlarga ko‘ra, Qozog‘istonda katta avariya sodir bo‘lishi mumkinligi haqida axborotlar bo‘lgan, biroq hukumat ushbu muammolar haqida tegishli tomonlar (O‘zbekiston va Qirg‘izistonni) ogohlantirmagan. Ba’zi mutaxassislar ham Qozog‘istonda energetika infratuzilmasini rivojlantirish va bugungi kundagi standartlarga moslashtirish uchun yetarlicha e’tibor qaratilmaganini ta’kidlagan.
O‘zbekiston Energetika vazirligi matbuot xizmati xabar berishicha, hukumat komissiyasi hodisa sabablarini o‘rganishda davom etmoqda.
“Yuzaga kelgan vaziyat munosabati bilan O‘zbekiston prezidenti topshirig‘iga binoan hodisa sabablarini o‘rganish bo‘yicha mamlakat bosh vaziri boshchiligida hukumat komissiyasi tuzildi. Komissiya ishining natijalari rasman e’lon qilinadi”, — deyiladi Energetika vazirligi xabarida.
Izoh (0)