O‘zbekistonda 25-yanvar kuni kuzatilgan elektr energiyasi ta’minotidagi uzilishlar paytida vaksina saqlash omborlari maxsus generatorlar yordamida uzluksiz elektr toki bilan ta’minlangan. Bu haqda Sanitariya-epidemiologik osoyishtalik va jamoat salomatligi xizmati matbuot kotibi Muhammadjon Bozorovga tayanib, “Gazeta.uz” xabar berdi.
Qayd etilishicha, hozirgi paytda O‘zbekiston bo‘yicha jami 221 ta vaksina saqlash omborlari bor. Ularning 206 tasi kichik omborxonalar bo‘lib, ular tumanlarda joylashgan, 14 tasi Qoraqalpog‘iston Respublikasi, viloyatlar va Toshkent shahrida va 1 tasi O‘zbekiston Milliy vaksinalar saqlash ombori hisoblanadi.
“25-yanvarda kuzatilgan elektr energiyasi ta’minotidagi uzilishlar paytida vaksina saqlash omborlari maxsus generatorlar yordamida uzluksiz elektr toki bilan ta’minlandi. Chekka-chekka tumanlardagi vaksina saqlash omborlarining barchasida generatorlar yo‘qligi bois ular ‘dvijok’lar yordamida elektr energiyasi bilan ta’minlandi”, — deydi SES matbuot kotibi.
Uning so‘zlariga ko‘ra, 27-yanvar holati bo‘yicha O‘zbekistonda 7 milliondan ortiq ishlatilmagan vaksinalar bor. Bular Moderna, Pfizer va ZF-UZ-VAC2001 vaksinalari.
“Har bitta emlash ishlarini olib boradigan poliklinikalarning o‘z generatorlari bor. Elektr toki o‘chgani bilan bu ularning ishiga ta’sir qilmagan, qanday ishlagan bo‘lsa, shunday ishlashni davom etgan. Shu sababli bir dona vaksina ham yaroqsiz holga kelmagan”, — deya ta’kidlagan Vaksinalar va immunoprofilaktika bo‘limi boshlig‘i Diloram Tursunova. Uning aytishicha, poliklinikalar oldinroq 1 oy muddatga yetadigan vaksinalarni olib ketgan bo‘lgan.
Eslatib o‘tamiz, O‘zbekistonning qator viloyatlari 25-yanvar kuni soat 11:00 larda elektr energiyasi ta’minoti uzilgandi. Shu kuni Sog‘liqni saqlash vazirligi matbuot kotibi Furqat Sanayev svet o‘chishidan xavotirlanishga o‘rin yo‘qligini, barcha operatsion bloklar qo‘shimcha ta’minot generatorlariga ulanganini “Daryo”ga ma’lum qildi.
Shuningdek, SSV mamlakatdagi barcha tibbiyot muassasalari, xususan, ulardagi reanimatsiya bo‘limlari, tug‘ruq komplekslari va koronavirusga ixtisoslashgan shifoxonalarda mahalliy hokimliklar bilan birgalikda elektr ta’minotida uzilishlarning oldini olishga qaratilgan zarur choralar ko‘rilayotganini e’lon qilgandi.
Izoh (0)