Qashqadaryo viloyatining Dehqonobod tumanida tajriba sifatida konteynerlardan tibbiyot maskanlari tashkil etilmoqda. Bu haqda “Daryo”ga tuman hokimligi axborot xizmati xabar berdi.
Qayd etilishicha, tuman hokimi Zoir Aliqulov va prokuror Laziz Hamroyev taklifi bilan tumanning chekka qishloqlari, xususan, “Usmon Yusupov” mahallasidagi Beshqo‘ton qishlog‘ida aholini sifatli tibbiy xizmat bilan ta’minlash va ularga qulaylik yaratish maqsadida konteynerdan qulay jihozlangan tibbiyot punkti tashkil etilgan.
“Beshqo‘ton qishlog‘i oilaviy shifokorlik punktidan olti kilometr uzoqlikda joylashgan bo‘lib, 876 ta xonadonda yashovchi 3892 nafar aholi o‘z vaqtida tibbiy xizmatdan foydalanishda muammolarga duch kelayotgandi. Bolalarni emlash va tibbiy ko‘rikdan o‘tish uchun qishning sovuq kunlarida uzoq masofani bosib o‘tishga majbur bo‘layotgan aholining mas’ullarga shikoyati ko‘paydi. Shu sabab hokim va prokuror taklifi bilan konteynerlardan tibbiyot maskani tashkil etish yo‘lga qo‘yildi”, — deydi tuman tibbiyot birlashmasi bosh shifokori Shavkat Amirov.
Bosh shifokorning qo‘shimcha qilishicha, Beshqo‘ton qishlog‘ida konteynerdan tashkil etilgan tibbiyot maskanida uch nafar patronaj hamshira faoliyat yuritishni boshlagan bo‘lib, haftaning har bir kunida malakali vrachlar tomonidan qabul ham tashkil etilishi yo‘lga qo‘yilgan.
Hokimlik axborot xizmati mas’ullari kelajakda tumanda yana shunday 9 ta tibbiyot maskani ish boshlashi reja qilinganini bildirdi.
Eslatib o‘tamiz, O‘zbekistonda 2021-yilning 1-yanvar holatiga ko‘ra faoliyat yuritayotgan shifoxonalar soni 1216 tani tashkil etgan. Mavjud shifoxonalarning eng ko‘pi — 147 tasi Toshkent shahrida joylashgan bo‘lsa, eng kam shifoxona Navoiy viloyati hissasiga to‘g‘ri keladi — 37 ta.
Izoh (0)