Ўзбекистонда 25 январь куни кузатилган электр энергияси таъминотидаги узилишлар пайтида вакцина сақлаш омборлари махсус генераторлар ёрдамида узлуксиз электр токи билан таъминланган. Бу ҳақда Санитария-эпидемиологик осойишталик ва жамоат саломатлиги хизмати матбуот котиби Муҳаммаджон Бозоровга таяниб, «Gazeta.uz» хабар берди.
Қайд этилишича, ҳозирги пайтда Ўзбекистон бўйича жами 221 та вакцина сақлаш омборлари бор. Уларнинг 206 таси кичик омборхоналар бўлиб, улар туманларда жойлашган, 14 таси Қорақалпоғистон Республикаси, вилоятлар ва Тошкент шаҳрида ва 1 таси Ўзбекистон Миллий вакциналар сақлаш омбори ҳисобланади.
«25 январда кузатилган электр энергияси таъминотидаги узилишлар пайтида вакцина сақлаш омборлари махсус генераторлар ёрдамида узлуксиз электр токи билан таъминланди. Чекка-чекка туманлардаги вакцина сақлаш омборларининг барчасида генераторлар йўқлиги боис улар ‘движок’лар ёрдамида электр энергияси билан таъминланди», — дейди СЕС матбуот котиби.
Унинг сўзларига кўра, 27 январь ҳолати бўйича Ўзбекистонда 7 миллиондан ортиқ ишлатилмаган вакциналар бор. Булар Moderna, Pfizer ва ZF-UZ-VAC2001 вакциналари.
«Ҳар битта эмлаш ишларини олиб борадиган поликлиникаларнинг ўз генераторлари бор. Электр токи ўчгани билан бу уларнинг ишига таъсир қилмаган, қандай ишлаган бўлса, шундай ишлашни давом этган. Шу сабабли бир дона вакцина ҳам яроқсиз ҳолга келмаган», — дея таъкидлаган Вакциналар ва иммунопрофилактика бўлими бошлиғи Дилорам Турсунова. Унинг айтишича, поликлиникалар олдинроқ 1 ой муддатга етадиган вакциналарни олиб кетган бўлган.
Эслатиб ўтамиз, Ўзбекистоннинг қатор вилоятлари 25 январь куни соат 11:00 ларда электр энергияси таъминоти узилганди. Шу куни Соғлиқни сақлаш вазирлиги матбуот котиби Фурқат Санаев свет ўчишидан хавотирланишга ўрин йўқлигини, барча операцион блоклар қўшимча таъминот генераторларига уланганини «Дарё»га маълум қилди.
Шунингдек, ССВ мамлакатдаги барча тиббиёт муассасалари, хусусан, улардаги реанимация бўлимлари, туғруқ комплекслари ва коронавирусга ихтисослашган шифохоналарда маҳаллий ҳокимликлар билан биргаликда электр таъминотида узилишларнинг олдини олишга қаратилган зарур чоралар кўрилаётганини эълон қилганди.
Изоҳ (0)