Apple o‘zining iPhone smartfonlariga bank kartalaridan to‘lovlarni kontaktsiz qabul qilish imkonini beradigan funksiya qo‘shishni rejalashtirmoqda. Bu haqda o‘z manbalariga tayanib, Bloomberg xabar berdi.
Nashr ma’lumotlariga ko‘ra, kompaniya mazkur funksiya ustida 2020-yildan beri ish olib bormoqda. Aynan o‘shanda Apple smartfonlardan mobil to‘lov terminali sifatida foydalanish imkonini beradigan Kanadaning Mobeewave startapini sotib olgandi. Ushbu bitim qiymati 100 million dollarni tashkil etgan.
iPhone’ni to‘lov terminaliga aylantirish uchun Apple mavjud texnik imkoniyatlardan foydalanishi kerak bo‘ladi — masalan, ayni vaqtda Apple Pay uchun mo‘ljallangan NFC texnologiyasidan. Ammo hozirda iPhone’dan to‘lovlarni qabul qilish uchun sotuvchilar telefonga ulanishi kerak bo‘ladigan to‘lov terminallaridan foydalanmoqda. Yangi texnologiya yordamida bunga zarurat tug‘ilmaydi.
Yangi texnologiya Apple Pay’ning bir qismiga aylanadimi yoki kompaniya uchun alohida to‘lov tizimi sifatida ishga tushiriladimi — bu hozircha noma’lum.
iOS operatsion tizimini ushbu funksiyaga moslab yangilash ishlari yaqin oylarda boshlanishi kutilmoqda. Tez orada kompaniya iOS 15.4 ning beta-versiyasini taqdim etishi kerak.
Apple’ning raqobatchisi bo‘lgan Janubiy Koreyaning Samsung kompaniyasi ham o‘z smartfonlariga shu kabi funksiyani qo‘shmoqchi. Kompaniya smartfon orqali to‘lovni amalga oshirish tizimini 2019-yilda namoyish etgandi.
Eslatib o‘tamiz, 2021-yilning iyunida Apple kompaniyasi Apple ID akkauntlarini meros qilib qoldirishga ruxsat bergani, shuningdek, dasturlardagi maxfiylik nazoratini kuchaytirishi to‘g‘risida xabar berilgandi. Endilikda iCloud sozlamalarida foydalanuvchi vafot etgan taqdirda, akkauntini kimga qoldirib ketishi mumkinligi borasida ishonchli shaxsni ko‘rsatishi mumkin. Shuningdek, ishonchli odam foydalanuvchiga Apple ID parolini unutgan taqdirda, uni qayta tiklash uchun verifikatsiya kodi taqdim etiladi.
Izoh (0)